Ap Local Body Elections: ఊరంతా గెలుపు సంబరాలు చేసుకోవాల్సిన వేళ ఆ గ్రామంలో గుండెలు పగిలే రోదనలు మిగిలాయి. ప్రజలకు సేవ చేయాలన్న ఆశయంతో ఎన్నికల బరిలోకి దిగిన ఒక యువ మాతృమూర్తి, ప్రజల గుండెల్లో గెలిచినా ఆ విజయాన్ని కళ్లారా చూడకుండానే కన్నుమూశారు.
తూర్పుగోదావరి జిల్లా దేవరపల్లి మండలం ధుమంతునిగూడెంలో జరిగిన ఈ దారుణ ఘటన స్థానిక ప్రజలను, రాజకీయ శ్రేణులను తీవ్ర దిగ్భ్రాంతికి గురిచేసింది.

జనసేన అభ్యర్థిగా ఇంటింటికీ తిరిగి..
ధుమంతునిగూడెం ఎంపీటీసీ స్థానం నుంచి జనసేన పార్టీ అభ్యర్థిగా గారపాటి దివ్య (28) పోటీ చేశారు. ప్రచారంలో అత్యంత చురుగ్గా పాల్గొంటూ, గ్రామాభివృద్ధికి పాటుపడతానని ఇంటింటికీ తిరిగి ఓట్లు అభ్యర్థించారు. ఆమెలోని ఉత్సాహాన్ని, నిస్వార్థ సేవా గుణాన్ని గుర్తించిన గ్రామస్థులు దివ్యకు ఏకపక్షంగా మద్దతు తెలిపారు.
ఓట్ల లెక్కింపునకు ముందే గుండెపోటు!
పోలింగ్ ముగిసి, శనివారం ఉదయం ఓట్ల లెక్కింపు ప్రారంభం కావడానికి కొద్దిసేపటి ముందే తీవ్ర విషాదం చోటుచేసుకుంది. దివ్య అకస్మాత్తుగా గుండెపోటుకు గురై కన్నుమూశారు. అప్పటివరకు తమతో నవ్వుతూ మాట్లాడిన యువ నాయకురాలు హఠాన్మరణం చెందడంతో కుటుంబ సభ్యులు, ఊరి ప్రజలు శోకసంద్రంలో మునిగిపోయారు.
352 ఓట్ల భారీ మెజారిటీతో విజయం!
కౌంటింగ్ ఫలితాలు వెలువడగా.. ప్రత్యర్థి వైసీపీ అభ్యర్థిపై దివ్య ఏకంగా 352 ఓట్ల భారీ మెజారిటీతో ఘన విజయం సాధించినట్లు అధికారులు ప్రకటించారు.
కానీ, ఈ గెలుపు వార్త గ్రామానికి ఆనందాన్ని ఇవ్వలేకపోయింది. తమ కోసం నిలబడిన నాయకురాలు భౌతికంగా తమ మధ్య లేకపోవడంతో ధుమంతునిగూడెం వాసులు కన్నీరు మున్నీరవుతున్నారు.
ఐదేళ్ల బాబు, 3 నెలల పసికందు
దివ్యది ప్రేమ వివాహం. ఆమెకు ఐదేళ్ల బాబుతో పాటు కేవలం 3 నెలల వయసున్న మరో పసిపాప ఉన్నారు. తల్లి వెచ్చని స్పర్శ, ఆప్యాయత తెలియాల్సిన వయసులోనే ఆ పసికందులు అమ్మను కోల్పోవడం చూసి స్థానికులు తట్టుకోలేకపోతున్నారు.
28 ఏళ్ల చిన్న వయసులోనే మంచి భవిష్యత్తు ఉన్న నాయకురాలు మృతి చెందడంపై జనసేన శ్రేణులతో పాటు పలు రాజకీయ పార్టీల నాయకులు తీవ్ర సంతాపం వ్యక్తం చేశారు.