Mahabubabad Baby Death: మహబూబాబాద్ జిల్లాలో విషాదకర ఘటన చోటుచేసుకుంది. కుటుంబ కలహాల నేపథ్యంలో 8 నెలల పసికందు మృతి చెందగా, తల్లి ఆత్మహత్యాయత్నానికి పాల్పడినట్లు సమాచారం. భోజ్యతండాలో జరిగిన ఈ ఘటన స్థానికంగా కలకలం రేపింది.
వివరాల ప్రకారం.. భోజ్యతండాకు చెందిన సుప్రజకు మూడేళ్ల క్రితం బానోత్ బన్సీలాల్తో వివాహమైంది. వీరికి త్రిష అనే 8 నెలల కుమార్తె ఉంది. కుటుంబంలో అత్త బాలితో సుప్రజకు గొడవ జరిగినట్లు తెలుస్తోంది. ఈ క్రమంలో ఇంట్లో ఎవరూ లేని సమయంలో సుప్రజ తన కుమార్తె గొంతు నులిమినట్లు ఆరోపణలు ఉన్నాయి. దీంతో చిన్నారి మృతి చెందినట్లు ప్రాథమిక సమాచారం.
చిన్నారి మృతి అనంతరం సుప్రజ ఫ్యాన్కు ఉరివేసుకుని ఆత్మహత్యాయత్నం చేసినట్లు తెలుస్తోంది. ఆ ప్రయత్నం విఫలం కావడంతో బాత్రూం శుభ్రం చేసేందుకు ఉపయోగించే లిక్విడ్ తాగినట్లు సమాచారం. ఆమె పరిస్థితిని గమనించిన స్థానికులు వెంటనే ఆసుపత్రికి తరలించారు. ప్రస్తుతం ఆమెకు వైద్య చికిత్స అందిస్తున్నట్లు తెలుస్తోంది.
సమాచారం అందుకున్న పోలీసులు ఘటనాస్థలానికి చేరుకుని పరిశీలించారు. చిన్నారి మృతిపై కేసు నమోదు చేసి దర్యాప్తు చేపట్టారు. ఘటనకు దారితీసిన పరిస్థితులు, కుటుంబ వివాదాల నేపథ్యంపై వివరాలు సేకరిస్తున్నారు. పోలీసుల దర్యాప్తు పూర్తయిన తర్వాతే ఘటనకు సంబంధించిన పూర్తి వివరాలు వెల్లడయ్యే అవకాశం ఉంది.