Anitha Chowdary: విమాన టికెట్లు బుక్ చేస్తామంటూ నకిలీ ట్రావెల్ ఏజెన్సీ పేరుతో సైబర్ నేరగాళ్లు నటి అనితా చౌదరిని మోసం చేశారు. ఆమె బ్యాంకు ఖాతా నుంచి ఏకంగా రూ.4.14 లక్షలు కాజేశారు. అమెరికాలోని వాషింగ్టన్ డీసీలో ఉంటున్న తన కుమారుడి పుట్టినరోజు వేడుకలకు హాజరయ్యేందుకు బిజినెస్ క్లాస్ రిటర్న్ టికెట్లు బుక్ చేసుకోవాలనుకున్న ఆమె, ఆన్లైన్లో ట్రావెల్ ఏజెన్సీ కోసం వెతికి సైబర్ వలలో చిక్కుకున్నారు. బాధితురాలి ఫిర్యాదు మేరకు సైబర్ క్రైమ్ పోలీసులు కేసు నమోదు చేసి దర్యాప్తు చేపట్టారు.

Anitha Chowdary: ఆన్లైన్ వెబ్సైట్ ద్వారా ఎర.. డెబిట్ కార్డు వివరాలు, ఓటీపీలతో మోసం
హైదరాబాద్ మాదాపూర్లోని కావూరి హిల్స్లో నివసిస్తున్న అనితా చౌదరి, ఈ నెల 12న విమాన టికెట్ల బుకింగ్ కోసం ఆన్లైన్లో వెతికారు. ఈ క్రమంలో ‘లో ఫ్లై ట్రావెల్స్ టూర్స్ అండ్ ట్రావెల్స్’ అనే సంస్థ వెబ్సైట్లోని ఫోన్ నంబర్కు సంప్రదించగా రాజేశ్ అనే వ్యక్తి మాట్లాడాడు. వాషింగ్టన్ డీసీకి బిజినెస్ క్లాస్ రిటర్న్ టికెట్ల ధర రూ.4,14,180 అవుతుందని చెప్పి, బుకింగ్ కోసం డెబిట్ కార్డు వివరాలు అవసరమని నమ్మించాడు. అనంతరం ఓ ఫారం పంపించి అందులో కార్డు వివరాలు నమోదు చేయించాడు. ఫోన్లో మాటల్లో పెట్టి, మొబైల్కు వచ్చిన ఓటీపీలను (OTP) తెలుసుకున్న నిందితుడు క్షణాల్లో ఆమె ఖాతా నుంచి నగదును కాజేశాడు.
పోలీసులకు ఫిర్యాదు
కొద్దిసేపటికే క్లియర్ట్రిప్ ద్వారా తన ఖాతా నుంచి రూ.4,14,180 డెబిట్ అయినట్లు అనితా చౌదరికి మెసేజ్ వచ్చింది. అయితే, విమాన టికెట్ల బుకింగ్ పూర్తయినట్లు ఎలాంటి ధ్రువీకరణ అందకపోవడంతో తాను మోసపోయానని ఆమె గుర్తించారు. వెంటనే బ్యాంకు కస్టమర్ కేర్కు ఫిర్యాదు చేసి, ఆపై సైబర్ క్రైమ్ పోలీసులను ఆశ్రయించారు. బాధితురాలి ఫిర్యాదుతో రాజేశ్పై కేసు నమోదు చేసిన పోలీసులు.. నకిలీ ట్రావెల్ ఏజెన్సీ వెనుక ఉన్న ముఠా వివరాలు, నగదు బదిలీ అయిన ఖాతాలపై ముమ్మరంగా దర్యాప్తు చేస్తున్నారు.