Ananthapur Bus Accident: అనంతపురం జిల్లాలో గురువారం తెల్లవారుజామున ఘోర రోడ్డు ప్రమాదం చోటుచేసుకుంది. రాప్తాడు మండలం రామనేపల్లి సమీపంలో ఒక ప్రైవేట్ ట్రావెల్స్ బస్సు అదుపుతప్పి బోల్తా పడింది. ఈ ప్రమాదంలో బస్సులో ప్రయాణిస్తున్న సుమారు 30 నుంచి 40 మంది ప్రయాణికులు గాయపడ్డారు. తెల్లవారుజామున 3 గంటల సమయంలో ప్రయాణికులంతా గాఢనిద్రలో ఉన్న వేళ ఈ దుర్ఘటన జరగడంతో ఒక్కసారిగా హాహాకారాలు మిన్నంటాయి.
బాధితులు, పోలీసుల కథనం ప్రకారం.. ఈ ప్రైవేట్ ట్రావెల్స్ బస్సు బెంగళూరు నుంచి హైదరాబాద్కు బయలుదేరింది. బస్సు రామనేపల్లి సమీపానికి చేరుకోగానే ఒక్కసారిగా అదుపుతప్పి రోడ్డు పక్కకు బోల్తా పడింది. ప్రమాద సమయంలో బస్సులో 30 నుంచి 40 మంది వరకు ప్రయాణికులు ఉన్నారు. డ్రైవర్ నిద్రమత్తులోకి జారుకోవడం వల్లే బస్సు అదుపుతప్పి బోల్తా పడిందని ప్రమాదం నుంచి బయటపడిన ప్రయాణికులు చెబుతున్నారు.
ప్రమాదం గురించి సమాచారం అందిన వెంటనే అనంతపురం జిల్లా పోలీసులు హుటాహుటిన సంఘటనా స్థలానికి చేరుకున్నారు. స్థానికుల సహాయంతో బస్సులో చిక్కుకున్న ప్రయాణికులను బయటకు తీసి సహాయక చర్యలు చేపట్టారు. గాయపడిన వారిని వెంటనే అంబులెన్సుల ద్వారా స్థానిక ఆస్పత్రికి తరలించి వైద్యం అందిస్తున్నారు. ఈ ఘటనపై పోలీసులు కేసు నమోదు చేసుకుని దర్యాప్తు ప్రారంభించారు. ప్రమాదానికి గల కచ్చితమైన కారణాలు, క్షతగాత్రుల పూర్తి వివరాలు ఇంకా తెలియాల్సి ఉంది.