షేర్: f 𝕏 ✉ ✈ in @
xpressnews.co.in 19 నవం 2026, 5:44 ఉద.
అంతర్జాతీయం

మహమ్మద్‌ యూనస్‌ ఇంటికి నిప్పు

Truth. Perspective. Journalism.
ప్రచురణ తేదీ: 19 నవం 2026, 5:44 ఉద. రచన: One News Desk
7 వీక్షణలు 0 వ్యాఖ్యలు
మహమ్మద్‌ యూనస్‌ ఇంటికి నిప్పు

Bangladesh: బంగ్లాదేశ్‌లో రాజకీయ హింస మరోసారి కట్టలు తెంచుకుంది. మరణశిక్ష పడినప్పటికీ తాను తిరిగి స్వదేశానికి వస్తున్నట్లు మాజీ ప్రధాని షేక్ హసీనా ప్రకటించడం, అవామీ లీగ్ దేశవ్యాప్త లాక్‌డౌన్‌కు పిలుపునివ్వడంతో బంగ్లాదేశ్ అగ్నిగుండంలా మారింది. దేశవ్యాప్తంగా ఉన్న 64 పరిపాలనా జిల్లాల్లో ఏకంగా 28 జిల్లాల్లో డజన్ల కొద్దీ దేశీయ బాంబు పేలుళ్లు సంభవించగా, పలు ప్రాంతాల్లో జరిగిన దాడుల్లో నలుగురు ప్రాణాలు కోల్పోయారు.

మహమ్మద్ యూనుస్ పూర్వీకుల ఇంటికి నిప్పు..

రాజధాని ఢాకాతో పాటు పలు జిల్లాల్లో ఆందోళనకారులు వాహనాలు, భవనాలకు నిప్పంటించి బీభత్సం సృష్టించారు. చటోగ్రామ్‌లోని తాత్కాలిక ప్రభుత్వ మాజీ అధిపతి మహమ్మద్ యూనుస్ పూర్వీకుల ఇంటిని గుర్తుతెలియని వ్యక్తులు తగులబెట్టారు. అంతేకాకుండా సిల్హెట్, రాజ్‌షాహి, బరిసాల్, ఫరీద్‌పూర్ ప్రాంతాల్లో యూనుస్‌కు చెందిన గ్రామీణ బ్యాంకు శాఖలపైనా వరుస దాడులు జరిగాయి. ఢాకాలో అవామీ లీగ్‌కు చెందిన ఇద్దరు నేతల ఇళ్లపై అధికార బీఎన్‌పీ (BNP) కార్యకర్తలు దాడి చేసి నిప్పంటించినట్లు స్థానిక పత్రికలు వెల్లడించాయి.

నరైల్ జిల్లాలో బీఎన్‌పీ ర్యాలీపై అవామీ లీగ్ కార్యకర్తలు జరిపిన దాడిలో ఇద్దరు స్థానిక నేతలు మరణించారు. ఫరీద్‌పూర్, పిరోజ్‌పూర్‌లలో మరో బీఎన్‌పీ నేత, ఒక రవాణా కార్మికుడు ప్రాణాలు కోల్పోయారు. ఢాకా హింసలో నలుగురు తీవ్రంగా గాయపడ్డారు.

ఉద్రిక్తతలకు అసలు కారణం ఇదే..

2024 ఆగస్టు 5న విద్యార్థుల ఉద్యమం, జులై తిరుగుబాటుతో అధికారాన్ని కోల్పోయిన షేక్ హసీనా ప్రస్తుతం భారత్‌లో ఆశ్రయం పొందుతున్నారు. గతేడాది ప్రత్యేక ట్రిబ్యునల్ ఆమెకు మరణశిక్ష విధించింది. ఆ తీర్పు వెలువడిన వార్షికోత్సవం సందర్భంగా అవామీ లీగ్ దేశవ్యాప్త బంద్‌కు పిలుపునిచ్చింది. దీనికి తోడు, మరణశిక్ష ఉన్నప్పటికీ డిసెంబర్‌లో ఎట్టి పరిస్థితుల్లోనూ బంగ్లాదేశ్‌కు తిరిగి వస్తానని ఈ నెల ప్రారంభంలో హసీనా ప్రకటించడంతో రాజకీయ వాతావరణం ఒక్కసారిగా వేడెక్కింది.

పోలీస్ స్టేషన్ ముట్టడి.. ప్రధాని తారిఖ్ రెహమాన్ ఫైర్

హసీనా స్వస్థలమైన తుంగిపారాలో మంగళవారం 30 మంది అనుమానిత మద్దతుదారులను పోలీసులు అరెస్టు చేయడంతో ఉద్రిక్తత తారస్థాయికి చేరింది. వందలాది మంది ఆందోళనకారులు పోలీస్ స్టేషన్‌ను చుట్టుముట్టడంతో పోలీసులు స్టేషన్‌ను ఖాళీ చేసి వెళ్లాల్సి వచ్చింది. మరోవైపు, బంగ్లాదేశ్ ప్రధాని తారిఖ్ రెహమాన్ అవామీ లీగ్‌ను ఒక ‘ఉగ్రవాద సంస్థ’గా, ‘ఓడిపోయిన ఫాసిస్ట్ శక్తి’గా అభివర్ణించారు. ప్రజాస్వామ్య శక్తులన్నీ ఏకమై 2024 ఉద్యమ స్ఫూర్తితో ఆ శక్తులను అణచివేయాలని ఆయన పిలుపునిచ్చారు.

రంగంలోకి బలగాలు.. 565 మంది అరెస్ట్

పరిస్థితులు చేయిదాటకుండా ఉండేందుకు హసీనా జన్మస్థలమైన గోపాల్‌గంజ్ సహా సమస్యాత్మక ప్రాంతాల్లో వేలాది మంది బోర్డర్ గార్డ్ బంగ్లాదేశ్ సిబ్బందిని మోహరించారు.

గడిచిన 24 గంటల్లో ఒక్క ఢాకా నగరంలోనే 565 మందిని పోలీసులు అరెస్టు చేశారు. వీరిలో హసీనా ప్రభుత్వంలో విద్యాశాఖ మంత్రిగా పనిచేసిన నురుల్ ఇస్లాం నాహిద్ కూడా ఉన్నారు.

ఆడియో, వీడియో ఆధారాలతో అల్లర్లకు పాల్పడిన ప్రతి ఒక్కరిపై కఠిన చర్యలు తీసుకుంటామని హోంమంత్రి సలాహుద్దీన్ అహ్మద్ హెచ్చరించారు.

2024లో హసీనా ప్రభుత్వం కూలిన తర్వాత యూనుస్ పాలనలో అవామీ లీగ్‌పై నిషేధం విధించడంతో పాటు, బంగ్లాదేశ్ వ్యవస్థాపకుడు షేక్ ముజిబుర్ రెహమాన్ నివాసం, 1971 విముక్తి పోరాట స్మారకాలను ధ్వంసం చేశారు. ఇప్పుడు మళ్లీ దేశవ్యాప్తంగా హింసాత్మక ఘటనలు చెలరేగడం అంతర్జాతీయంగా ఆందోళన కలిగిస్తోంది.

#అంతర్జాతీయం
Bangladesh: బంగ్లాదేశ్‌లో రాజకీయ హింస మరోసారి కట్టలు తెంచుకుంది. మరణశిక్ష పడినప్పటికీ తాను తిరిగి స్వదేశానికి వస్తున్నట్లు మాజీ ప్రధాని షేక్ హసీనా ప్రకటించడం, అవామీ లీగ్ దేశవ్యాప్త లాక్‌డౌన్‌కు…