Stock Market: బ్యాంకింగ్, ఫైనాన్షియల్ షేర్లలో వెల్లువెత్తిన కొనుగోళ్ల మద్దతుతో దేశీయ స్టాక్ మార్కెట్లు శుక్రవారం భారీ లాభాలతో ముగిశాయి. ట్రేడింగ్ ముగిసే సమయానికి బీఎస్ఈ సెన్సెక్స్ (Sensex) ఏకంగా 897.96 పాయింట్లు (1.08 శాతం) ఎగబాకి 83,919.71 వద్ద స్థిరపడింది. మరోవైపు ఎన్ఎస్ఈ నిఫ్టీ (Nifty) 286.30 పాయింట్లు (1.12 శాతం) పెరిగి కీలకమైన 25,800 మైలురాయిని అధిగమించి 25,800.60 వద్ద ముగిసింది.
మార్కెట్ భారీ లాభాల్లో ప్రధాన పాత్ర ప్రైవేట్ బ్యాంకింగ్ షేర్లదే కావడం విశేషం. ముఖ్యంగా హెచ్డీఎఫ్సీ బ్యాంక్ 3.47 శాతం లాభపడి మార్కెట్ ర్యాలీకి నాయకత్వం వహించింది. కోటక్ మహీంద్రా బ్యాంక్ 2.59 శాతం, ఐసీఐసీఐ బ్యాంక్ 2.16 శాతం, యాక్సిస్ బ్యాంక్ 2.12 శాతం చొప్పున రాణించాయి. దీంతో నిఫ్టీ ప్రైవేట్ బ్యాంక్ సూచీ 3.01 శాతం, నిఫ్టీ బ్యాంక్ 2.49 శాతం లాభపడ్డాయి. వీటితో పాటు బజాజ్ ఫైనాన్స్, మారుతీ సుజుకీ, అల్ట్రాటెక్ సిమెంట్ షేర్లు కూడా సూచీల జోరుకు తోడయ్యాయి. మరోవైపు టైటాన్ (1.71 శాతం), టాటా స్టీల్ (1.69 శాతం), ఎన్టీపీసీ, హెచ్యూఎల్ షేర్లు నష్టాలతో ముగిశాయి.
ప్రపంచ మార్కెట్ల నుంచి బలహీన సంకేతాలు ఉన్నప్పటికీ, విదేశీ సంస్థాగత ఇన్వెస్టర్ల (FII) నిధుల ప్రవాహం, రూపాయి విలువ బలోపేతం కావడం మరియు అంతర్జాతీయంగా క్రూడాయిల్ ధరలు తగ్గడం దేశీయ మార్కెట్లకు సానుకూలంగా మారాయి. నవంబరు నెలలోనే ఎఫ్ఐఐలు ఏకంగా 12 బిలియన్ డాలర్లకు పైగా పెట్టుబడులను భారత ఈక్విటీలలోకి తీసుకొచ్చారు.
అయితే ఈ ర్యాలీ ప్రధానంగా లార్జ్ క్యాప్ షేర్లకే పరిమితమైంది. స్మాల్ క్యాప్, మైక్రో క్యాప్ సూచీలు నష్టాల్లో ముగియడంతో పాటు మార్కెట్ ఒడుదొడుకులను సూచించే ఇండియా ‘విక్స్’ (India VIX) 7.52 శాతం పెరిగి 17.32 వద్దకు చేరడం మదుపర్లలోని అప్రమత్తతను స్పష్టం చేస్తోంది.