షేర్: f 𝕏 ✉ ✈ in @
xpressnews.co.in 20 నవం 2026, 6:35 ఉద.
అంతర్జాతీయం

పాకిస్తాన్‌తో చర్చలకు రాహుల్‌ గాంధీ కీలక షరతు.. ఉగ్రవాదం ఆగాల్సిందే!

Truth. Perspective. Journalism.
ప్రచురణ తేదీ: 20 నవం 2026, 6:35 ఉద. రచన: One News Desk
7 వీక్షణలు 0 వ్యాఖ్యలు
పాకిస్తాన్‌తో చర్చలకు రాహుల్‌ గాంధీ కీలక షరతు.. ఉగ్రవాదం ఆగాల్సిందే!

Rahul Gandhi: భారత్‌, పాకిస్తాన్‌ మధ్య సంబంధాలు దశాబ్దాలుగా ఉద్రిక్తంగానే కొనసాగుతున్నాయి. ఇరు దేశాల మధ్య యుద్ధాలు, చర్చలు జరిగినప్పటికీ శాశ్వత శాంతి మాత్రం సాధ్యం కాలేదు. ఈ నేపథ్యంలో భారత్‌, పాకిస్తాన్‌ పరస్పర విభేదాలను పక్కనపెట్టి కలిసి పనిచేయగలవా? అనే ప్రశ్న అమెరికాలో లోక్‌సభ ప్రతిపక్ష నేత రాహుల్‌ గాంధీకి ఎదురైంది. దీనికి ఆయన ఇచ్చిన సమాధానం ఇప్పుడు చర్చనీయాంశంగా మారింది.

పాక్‌ విద్యార్థి ప్రశ్నకు రాహుల్‌ సమాధానం

అమెరికా పర్యటనలో ఉన్న రాహుల్‌ గాంధీ చికాగో యూనివర్సిటీలో నిర్వహించిన కార్యక్రమంలో విద్యార్థులు, అధ్యాపకులతో మాట్లాడారు. ఈ సందర్భంగా పాకిస్తాన్‌కు చెందిన ఖుష్‌ అనే విద్యార్థి భారత్‌, పాక్‌ మధ్య పరస్పర ఆరోపణలకు స్వస్తి పలికి, ఉమ్మడి ప్రయోజనాల కోసం కలిసి పనిచేసే అవకాశం ఉందా అని ప్రశ్నించాడు. దీనికి రాహుల్‌ గాంధీ స్పందిస్తూ.. ఇరు దేశాల మధ్య సహకారానికి అవకాశం ఉందని, అయితే ఒక పెద్ద సమస్య అడ్డంకిగా ఉందని చెప్పారు. అదే భారత్‌లో ఉగ్రవాదానికి పాకిస్తాన్‌ మద్దతు ఇవ్వడం, ప్రోత్సహించడమని స్పష్టం చేశారు. అమాయక ప్రజలు హత్యకు గురవుతున్న పరిస్థితుల్లో పాకిస్తాన్‌తో చర్చలు జరపడం సాధ్యం కాదని రాహుల్‌ అన్నారు. ఉగ్రవాదానికి మద్దతు ఇవ్వడం ఆగినప్పుడే ఇరు దేశాల మధ్య చర్చలు తిరిగి ప్రారంభమయ్యే అవకాశం ఉంటుందని పేర్కొన్నారు.

ఇజ్రాయెల్‌తో సంబంధాలపైనా కీలక వ్యాఖ్యలు

ఇదే కార్యక్రమంలో ఇజ్రాయెల్‌తో భారత్‌ సంబంధాలు, గాజా పరిణామాలపైనా రాహుల్‌ గాంధీ మాట్లాడారు. ఇజ్రాయెల్‌తో భారత్‌ మంచి సంబంధాలను కొనసాగించాలని, రక్షణ రంగంలోనూ సహకారం ఉండాలని అభిప్రాయపడ్డారు. అయితే అంతర్జాతీయ అంశాలపై భారత్‌ తీసుకునే నిర్ణయాలు ఇతర దేశాల ప్రయోజనాల ఆధారంగా కాకుండా మన దేశ ప్రయోజనాలకు అనుగుణంగా ఉండాలని స్పష్టం చేశారు. భారత్‌ జనాభా, పరిమాణం దృష్ట్యా ప్రపంచ వ్యవహారాల్లో స్వతంత్రంగా తన అభిప్రాయాన్ని వెల్లడించే సామర్థ్యం ఉందని అన్నారు. హమాస్‌ 2023 అక్టోబర్‌ 7న ఇజ్రాయెల్‌పై జరిపిన దాడిని ఖండించిన ఆయన, గాజాలో ఇజ్రాయెల్‌ సైనిక చర్యలపైనా విమర్శలు చేశారు.

Rahul Gandhi: ప్రపంచ వ్యవహారాల్లో భారత్‌ పాత్రపై చర్చ

అమెరికా, ఇరాన్‌ మధ్య చర్చల్లో పాకిస్తాన్‌ పాత్ర గురించి ప్రస్తావిస్తూ.. భారత్‌ అంతర్జాతీయ చర్చల్లో మరింత చురుగ్గా పాల్గొనాలని రాహుల్‌ గాంధీ అభిప్రాయపడ్డారు. ప్రపంచ వ్యవహారాల్లో భారత్‌ తన స్వంత వైఖరిని బలంగా వినిపించాలని అన్నారు. మొత్తంగా చికాగో యూనివర్సిటీలో జరిగిన ఈ కార్యక్రమంలో భారత్‌-పాక్‌ సంబంధాలు, ఉగ్రవాదం, ఇజ్రాయెల్‌తో సంబంధాలు, ప్రపంచ రాజకీయాల్లో భారత్‌ పాత్ర వంటి అంశాలపై రాహుల్‌ గాంధీ తన అభిప్రాయాలను వెల్లడించారు.

#అంతర్జాతీయం
Rahul Gandhi: భారత్‌, పాకిస్తాన్‌ మధ్య సంబంధాలు దశాబ్దాలుగా ఉద్రిక్తంగానే కొనసాగుతున్నాయి. ఇరు దేశాల మధ్య యుద్ధాలు, చర్చలు జరిగినప్పటికీ శాశ్వత శాంతి మాత్రం సాధ్యం కాలేదు. ఈ నేపథ్యంలో…