CBI : హరియాణాలోని పంచకులలో కేంద్ర దర్యాప్తు సంస్థ (CBI) అధికారులు చేపట్టిన ఆకస్మిక దాడిలో ఓ భారీ అవినీతి తిమింగలం అడ్డంగా దొరికిపోయింది. సెంట్రల్ గూడ్స్ అండ్ సర్వీసెస్ ట్యాక్స్ (CGST) సూపరింటెండెంట్గా విధులు నిర్వహిస్తున్న లవ్కుశ్, ఈ నెల 19న ఏకంగా రూ.10 లక్షలు లంచం తీసుకుంటుండగా సీబీఐ అధికారులు పక్కా వ్యూహంతో వలపన్ని రెడ్ హ్యాండెడ్గా పట్టుకున్నారు. ఒక ఉన్నత స్థాయి ప్రభుత్వ అధికారి ఇంత పెద్ద మొత్తంలో లంచం డిమాండ్ చేసి స్వీకరించడం స్థానికంగా, అధికార వర్గాల్లో తీవ్ర కలకలం రేపింది.

ఇంట్లో సోదాలు.. నోట్ల కట్టలు, విదేశీ కరెన్సీ, స్థిరాస్తి పత్రాల స్వాధీనం
లవ్కుశ్ను అదుపులోకి తీసుకున్న అనంతరం సీబీఐ బృందం అతడి నివాసంలో విస్తృతంగా సోదాలు నిర్వహించగా కళ్లు చెదిరే స్థాయిలో అక్రమాస్తులు బయటపడ్డాయి. తనిఖీల్లో భాగంగా రూ.24.29 లక్షల నగదు, రూ.15.65 లక్షల విలువైన విదేశీ కరెన్సీతో పాటు భారీగా బంగారం, వెండి ఆభరణాలను అధికారులు స్వాధీనం చేసుకున్నారు. వీటన్నింటి మొత్తం విలువ సుమారు రూ.1.86 కోట్లు ఉంటుందని సీబీఐ అంచనా వేసింది. వీటికి తోడు నిందితుడికి సంబంధించిన 6 బ్యాంకు ఖాతాలు, పలు ఆర్థిక పెట్టుబడులు, బీమా పాలసీలు మరియు కీలక స్థిరాస్తి పత్రాలను కూడా అధికారులు గుర్తించి జప్తు చేశారు.