షేర్: f 𝕏 ✉ ✈ in @
xpressnews.co.in 21 నవం 2026, 5:50 ఉద.
ఆర్థికం

దేశంలోనే నంబర్ వన్ బ్రాండ్‌గా ఎయిర్‌టెల్.. 12 ఏళ్లలో తొలిసారి రికార్డు!

Truth. Perspective. Journalism.
ప్రచురణ తేదీ: 21 నవం 2026, 5:50 ఉద. రచన: One News Desk
7 వీక్షణలు 0 వ్యాఖ్యలు
దేశంలోనే నంబర్ వన్ బ్రాండ్‌గా ఎయిర్‌టెల్.. 12 ఏళ్లలో తొలిసారి రికార్డు!

Airtel Most Valuable Brand: భారత్‌లో అత్యంత విలువైన బ్రాండ్‌గా ఎయిర్‌టెల్ అగ్రస్థానాన్ని కైవసం చేసుకుంది. కాంతర్ (Kantar) విడుదల చేసిన 2026 బ్రాండ్‌జెడ్ (BrandZ) టాప్ 100 అత్యంత విలువైన భారతీయ బ్రాండ్ల జాబితాలో భారతి ఎయిర్‌టెల్ మొదటి స్థానంలో నిలిచింది. 2014లో ఈ ర్యాంకింగ్స్ ప్రారంభమైన తర్వాత టెలికాం సంస్థ ఒకటి అగ్రస్థానాన్ని దక్కించుకోవడం ఇదే తొలిసారి. గత ఏడాదితో పోలిస్తే ఎయిర్‌టెల్ బ్రాండ్ విలువ 5 శాతం పెరిగి 43.2 బిలియన్ డాలర్లకు చేరింది. భారత కరెన్సీలో ఇది సుమారు రూ.3.8 లక్షల కోట్లకు సమానం. ఇప్పటివరకు అగ్రస్థానంలో ఉన్న హెచ్‌డీఎఫ్‌సీ బ్యాంక్ రెండో స్థానానికి పరిమితమైంది. ఈ సంస్థ బ్రాండ్ విలువ 35.6 బిలియన్ డాలర్లుగా నమోదైంది. టాటా కన్సల్టెన్సీ సర్వీసెస్ (TCS) 24.1 బిలియన్ డాలర్ల విలువతో మూడో స్థానంలో నిలిచింది. స్టేట్ బ్యాంక్ ఆఫ్ ఇండియా (SBI) 23.6 బిలియన్ డాలర్లతో నాలుగో స్థానంలో, ఐసీఐసీఐ బ్యాంక్ 20.1 బిలియన్ డాలర్లతో ఐదో స్థానంలో ఉన్నాయి.

టాప్ 100 బ్రాండ్ల విలువలో 12 శాతం తగ్గుదల

భారత్‌లోని టాప్ 100 అత్యంత విలువైన బ్రాండ్ల మొత్తం విలువ 460.3 బిలియన్ డాలర్లుగా కాంతర్ నివేదిక వెల్లడించింది. అయితే గత ఏడాదితో పోలిస్తే ఈ విలువ 12 శాతం తగ్గింది. ఈ మొత్తం భారత జీడీపీలో సుమారు 11 శాతానికి సమానం. మరోవైపు, ప్రపంచంలోని టాప్ 100 బ్రాండ్ల మొత్తం విలువ 22 శాతం పెరగడం గమనార్హం.

మీషో, రాయల్ ఎన్‌ఫీల్డ్‌కు భారీ వృద్ధి

ఈ ఏడాది బ్రాండ్ విలువలో అత్యధిక వృద్ధిని నమోదు చేసిన సంస్థగా ఈ-కామర్స్ సంస్థ మీషో నిలిచింది. దీని బ్రాండ్ విలువ 64 శాతం పెరిగి 1.9 బిలియన్ డాలర్లకు చేరింది. 60 శాతం వృద్ధితో రాయల్ ఎన్‌ఫీల్డ్ రెండో స్థానంలో నిలిచింది. ఆ సంస్థ బ్రాండ్ విలువ 3.8 బిలియన్ డాలర్లుగా నమోదైంది. టీవీఎస్ 33 శాతం, ఫోన్‌పే 31 శాతం, ఎస్‌బీఐ 26 శాతం వృద్ధిని సాధించాయి.

Airtel Most Valuable Brand: టాప్ 10లో ఉన్న బ్రాండ్లు ఇవే

కాంతర్ నివేదిక ప్రకారం భారతదేశంలోని అత్యంత విలువైన పది బ్రాండ్ల జాబితాలో ఎయిర్‌టెల్, హెచ్‌డీఎఫ్‌సీ బ్యాంక్, టీసీఎస్, ఎస్‌బీఐ, ఐసీఐసీఐ బ్యాంక్, అల్ట్రాటెక్ సిమెంట్, ఇన్ఫోసిస్, ఎల్‌ఐసీ, ఏషియన్ పెయింట్స్, ఫ్లిప్‌కార్ట్ ఉన్నాయి. ఈ ర్యాంకింగ్స్ ద్వారా భారతీయ బ్రాండ్ల మార్కెట్ విలువ, వినియోగదారుల్లో వాటి ఆదరణ, వ్యాపార వృద్ధి వంటి అంశాలపై స్పష్టత లభిస్తుందని కాంతర్ తెలిపింది. మారుతున్న వినియోగదారుల అవసరాలకు అనుగుణంగా కొత్త మార్కెట్లలో విస్తరించడం, బ్రాండ్‌పై నమ్మకాన్ని పెంచుకోవడం సంస్థలకు కీలకమని నివేదిక పేర్కొంది.

#ఆర్థికం
Airtel Most Valuable Brand: భారత్‌లో అత్యంత విలువైన బ్రాండ్‌గా ఎయిర్‌టెల్ అగ్రస్థానాన్ని కైవసం చేసుకుంది. కాంతర్ (Kantar) విడుదల చేసిన 2026 బ్రాండ్‌జెడ్ (BrandZ) టాప్ 100 అత్యంత…