Narendra Modi: దేశంలో ఇటీవల బంగారం ధరలు గణనీయంగా తగ్గుముఖం పట్టడంపై ప్రధానమంత్రి నరేంద్ర మోదీ ఆసక్తికర వ్యాఖ్యలు చేశారు. ఉత్తరప్రదేశ్లో నిర్వహించిన ఒక బహిరంగ సభలో ఆయన ప్రసంగిస్తూ పసిడి ధరల తగ్గుదల వెనుక ఉన్న కారణాన్ని ప్రస్తావించారు. సరిగ్గా ఏడాది క్రితం అనవసరమైన బంగారం కొనుగోళ్లను తగ్గించుకోవాలని తాను దేశ ప్రజలకు విజ్ఞప్తి చేసిన విషయాన్ని ఈ సందర్భంగా మోదీ గుర్తుచేశారు.
తాను చేసిన అభ్యర్థనకు దేశ ప్రజలు సానుకూలంగా స్పందించి, ఆచరణలో పెట్టడం వల్లే నేడు బంగారం ధరలు దిగొచ్చాయని ప్రధాని మోదీ అభిప్రాయపడ్డారు. ప్రజల్లో వచ్చిన ఈ మార్పు ఆర్థిక వ్యవస్థపై సానుకూల ప్రభావం చూపిందని ఆయన పేర్కొన్నారు.
గతంలో దేశంలో తీవ్ర ఆహార కొరత ఏర్పడిన విపత్కర పరిస్థితుల్లో, మాజీ ప్రధాని లాల్ బహదూర్ శాస్త్రి వారానికి ఒక పూట భోజనం మానేయాలని ఇచ్చిన పిలుపుకు యావత్ దేశం ఏకతాటిపై నిలిచి మద్దతు పలికిందని మోదీ గుర్తుచేశారు. ఇప్పుడు అదే స్ఫూర్తితో బంగారం కొనుగోళ్ల విషయంలో తాను చేసిన విజ్ఞప్తిని కూడా ప్రజలు గౌరవించి పాటించారని ప్రధాని సంతోషం వ్యక్తం చేశారు.