Peru Earthquake: దక్షిణ అమెరికా దేశమైన పెరూలో భారీ భూకంపం సంభవించింది. శుక్రవారం (నవంబర్ 20) రాత్రి మధ్య పెరూ ప్రాంతంలో బలమైన ప్రకంపనలు చోటుచేసుకున్నాయి. జర్మన్ రీసెర్చ్ సెంటర్ ఫర్ జియోసైన్సెస్ (GFZ) ఈ భూకంప తీవ్రతను రిక్టర్ స్కేలుపై 6.8గా నమోదు చేసింది. ఈ ప్రకంపనల ప్రభావం రాజధాని లిమా వరకు కనిపించింది. దీంతో ప్రజలు తీవ్ర భయాందోళనకు గురై ఇళ్ల నుంచి బయటకు పరుగులు తీశారు. పార్లమెంట్ భవనంలో ఉన్న చట్టసభ సభ్యులు సైతం సురక్షిత ప్రాంతాలకు వెళ్లారు. పెరూ జియోఫిజికల్ ఇన్స్టిట్యూట్ (IGP) వివరాల ప్రకారం.. ఆండీస్ పర్వత ప్రాంతంలోని జునిన్ ప్రావిన్స్లో భూకంప కేంద్రం నమోదైంది. భూమికి సుమారు 129 కిలోమీటర్ల లోతులో ప్రకంపనలు సంభవించాయి. ఈ ప్రాంతం రాజధాని లిమాకు తూర్పు దిశగా సుమారు 320 కిలోమీటర్ల దూరంలో ఉంది. అయితే పెరూ అధికారిక భూకంప సంస్థ ఈ ప్రకంపనల తీవ్రతను 6.7గా నమోదు చేసింది.
భూకంపం తర్వాత జునిన్ ప్రాంతంలో ఇప్పటివరకు ఎలాంటి ప్రాణ, ఆస్తి నష్టం జరిగినట్లు సమాచారం అందలేదని స్థానిక కౌన్సిల్ సభ్యుడు విసెంటే క్విస్పే తెలిపారు. ఈ స్థాయిలో భూకంపం రావడం తమ ప్రాంతంలో ఇదే తొలిసారి అని ఆయన పేర్కొన్నారు. మరోవైపు, భూకంపం కారణంగా సునామీ ముప్పు లేదని అమెరికా సునామీ హెచ్చరికల వ్యవస్థ స్పష్టం చేసింది.
పెరూ ప్రపంచంలోని ప్రధాన రాగి ఉత్పత్తి దేశాల్లో ఒకటి. దేశ ఆర్థిక వ్యవస్థలో మైనింగ్ రంగం కీలక పాత్ర పోషిస్తోంది. భూకంపం సంభవించిన జునిన్ ప్రాంతంలో చైనాకు చెందిన చినాల్కో నిర్వహిస్తున్న టొరోమోచో వంటి ప్రధాన రాగి గనులు ఉన్నాయి. ప్రస్తుతం ఈ గనులకు ఎలాంటి నష్టం వాటిల్లిందనే సమాచారం వెలువడలేదు.
పెరూ పసిఫిక్ రింగ్ ఆఫ్ ఫైర్ ప్రాంతంలో ఉంది. ఈ ప్రాంతంలో భూమి లోపల ఉండే టెక్టానిక్ ప్లేట్ల కదలికల కారణంగా తరచూ భూకంపాలు సంభవిస్తుంటాయి. ఈ ఏడాది జూలైలో జునిన్ ప్రాంతంలో 5.5 తీవ్రతతో వచ్చిన భూకంపం కారణంగా ఆరుగురు మరణించగా, పలువురు గాయపడ్డారు. ఆగస్టులో ఆండీస్ ప్రాంతంలో 6.7 తీవ్రతతో మరో భూకంపం సంభవించి ఇళ్లు, పాఠశాలలు దెబ్బతిన్నాయి. తాజాగా మరోసారి భారీ ప్రకంపనలు రావడంతో స్థానికులు ఆందోళనకు గురయ్యారు.