Trump Data Center Tax: అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. అమెరికాకు చెందిన టెక్ కంపెనీలు విదేశాల్లో డేటా సెంటర్లు నిర్మించడాన్ని తాము అనుమతించబోమని, అలాంటి ప్రాజెక్టులు చేపడితే భారీ పన్నులు విధిస్తామని హెచ్చరించారు. ఆర్టిఫిషియల్ ఇంటెలిజెన్స్ (ఏఐ), క్లౌడ్ కంప్యూటింగ్ రంగాల్లో అమెరికా ఆధిపత్యాన్ని కొనసాగించడంతో పాటు, టెక్ కంపెనీల పెట్టుబడులు దేశం దాటి వెళ్లకుండా చూడటమే ఈ ప్రతిపాదన వెనుక ఉద్దేశంగా కనిపిస్తోంది.
ఆసియా పర్యటన ముగించుకుని అమెరికాకు తిరిగొచ్చిన ట్రంప్.. నవంబర్ 20న వైట్హౌస్లో నిర్వహించిన మీడియా సమావేశంలో ఈ వ్యాఖ్యలు చేశారు. అమెరికా కంపెనీలు విదేశాల్లో డేటా సెంటర్లు ఏర్పాటు చేయకుండా చూస్తామని, ఒకవేళ అలా చేస్తే వాటిపై ‘భారీ పన్ను’ విధిస్తామని స్పష్టం చేశారు. అమెరికాలోని టెక్సాస్, కాలిఫోర్నియా, వెస్ట్ వర్జీనియా వంటి ప్రాంతాల్లో డేటా సెంటర్లు నిర్మించేందుకు అవసరమైన వనరులు, స్థలం, విద్యుత్ అందుబాటులో ఉన్నాయని పేర్కొన్నారు.
అధికారులకు కూడా ముందస్తు సమాచారం లేదట!

ఈ ప్రతిపాదన గురించి తన పాలనా యంత్రాంగంలోని అధికారులకు ముందుగానే చెప్పలేదని ట్రంప్ స్వయంగా వెల్లడించారు. మీడియా సమావేశంలోనే తొలిసారిగా ఈ విషయాన్ని ప్రకటించారు. అయితే ఈ పన్ను విధానం ఎప్పటి నుంచి అమల్లోకి వస్తుంది? ఏ కంపెనీలకు వర్తిస్తుంది? పన్ను ఎంత విధిస్తారు? అనే అంశాలపై స్పష్టత ఇవ్వలేదు. దీనికి సంబంధించిన అధికారిక ఉత్తర్వులు లేదా అమలు విధానం కూడా ఇంకా ప్రకటించలేదు.
అమెరికా కంపెనీలు విదేశాల్లో డేటా సెంటర్లు నిర్మించకుండా పన్నుల ద్వారా నిరోధించాలన్న ట్రంప్ వ్యాఖ్యలు అంతర్జాతీయ టెక్ రంగంలో చర్చకు దారితీశాయి. అయితే ఈ ప్రతిపాదనను అమలు చేయడానికి ఎలాంటి చట్టపరమైన మార్గాన్ని అనుసరిస్తారనే దానిపై స్పష్టత లేదు. ఫెడరల్ పన్నుల విధింపులో అమెరికా కాంగ్రెస్కు కీలక అధికారం ఉండటంతో ట్రంప్ ప్రతిపాదన అమలుపై ప్రశ్నలు తలెత్తుతున్నాయి.
భారత్లో డేటా సెంటర్ల విస్తరణపై ప్రభావం ఉంటుందా?
ప్రపంచవ్యాప్తంగా ఏఐ సేవలు, క్లౌడ్ కంప్యూటింగ్ వినియోగం పెరుగుతున్న నేపథ్యంలో గూగుల్ మాతృసంస్థ ఆల్ఫాబెట్, అమెజాన్, మైక్రోసాఫ్ట్, మెటా, ఒరాకిల్ వంటి అమెరికా టెక్ సంస్థలు వివిధ దేశాల్లో డేటా సెంటర్లను నిర్వహిస్తున్నాయి. వినియోగదారులకు వేగంగా సేవలు అందించడంతో పాటు, స్థానిక డేటా నిబంధనలకు అనుగుణంగా ఉండేందుకు ఆయా దేశాల్లో డేటా సెంటర్లు ఏర్పాటు చేస్తున్నాయి.
భారత్లోనూ డేటా సెంటర్ల రంగం విస్తరిస్తోంది. ముఖ్యంగా విశాఖపట్నం సహా పలు ప్రాంతాల్లో ఈ రంగానికి సంబంధించిన పెట్టుబడులు, ప్రాజెక్టులపై ఆసక్తి పెరుగుతోంది. ట్రంప్ ప్రతిపాదన అమలులోకి వస్తే విదేశాల్లో కొత్త డేటా సెంటర్లు ఏర్పాటు చేయాలనుకునే అమెరికా కంపెనీల పెట్టుబడి నిర్ణయాలపై ప్రభావం పడే అవకాశం ఉంది. అయితే భారత్లో ఇప్పటికే కొనసాగుతున్న ప్రాజెక్టులపై ఈ ప్రకటన ప్రభావం ఎలా ఉంటుందనేది స్పష్టత రావాల్సి ఉంది.
Trump Data Center Tax: అమెరికాలోనే డేటా సెంటర్ల నిర్మాణంపై వ్యతిరేకత
మరోవైపు అమెరికాలో డేటా సెంటర్ల నిర్మాణానికి స్థానిక ప్రజల నుంచి వ్యతిరేకత వ్యక్తమవుతోంది. వీటి వల్ల భారీగా విద్యుత్ వినియోగం, నీటి అవసరం పెరగడంతో పాటు స్థానిక విద్యుత్ బిల్లులు, పర్యావరణంపై ప్రభావం పడుతుందనే ఆందోళనలు ఉన్నాయి. CNBC నిర్వహించిన అక్టోబర్ 2026 ఆల్-అమెరికా ఎకనామిక్ సర్వేలో 63 శాతం మంది ఓటర్లు తమ నివాస ప్రాంతానికి 10 మైళ్ల పరిధిలో డేటా సెంటర్ నిర్మాణాన్ని వ్యతిరేకించారు. కేవలం 13 శాతం మంది మాత్రమే మద్దతు తెలిపారు.
ఏఐ రంగంలో చైనాతో పోటీపడుతున్న అమెరికా.. అత్యాధునిక కంప్యూటింగ్ సామర్థ్యాన్ని తమ దేశంలోనే పెంచుకోవాలని ప్రయత్నిస్తోంది. ఈ నేపథ్యంలో విదేశాల్లో డేటా సెంటర్ల నిర్మాణంపై ట్రంప్ చేసిన వ్యాఖ్యలు ప్రాధాన్యత సంతరించుకున్నాయి. అయితే ఆయన ప్రకటించిన పన్నుల ప్రతిపాదనకు సంబంధించిన పూర్తి వివరాలు వెలువడిన తర్వాతే భారత్ సహా ఇతర దేశాల్లోని డేటా సెంటర్ ప్రాజెక్టులపై ప్రభావం ఎంత ఉంటుందో అంచనా వేయగలం.