BJP MP Ramrao Wadkute: భారతీయ జనతా పార్టీ (బీజేపీ) సీనియర్ నేత, రాజ్యసభ సభ్యుడు రాంరావ్ వడ్కుటే కన్నుమూశారు. గుండెపోటు కారణంగా ఆయన మృతి చెందినట్లు కుటుంబ సభ్యులు వెల్లడించారు. ఇంట్లో ఉండగా ఛాతీలో నొప్పి రావడంతో కుటుంబ సభ్యులు వెంటనే ఆయన్ను ఢిల్లీలోని ఎయిమ్స్ (AIIMS) ఆసుపత్రికి తరలించారు. వైద్యులు అత్యవసర చికిత్స అందిస్తుండగానే ఆయన తుదిశ్వాస విడిచారు.
మహారాష్ట్ర రాజకీయాల్లో అనుభవజ్ఞుడైన నాయకుడిగా, మచ్చలేని నేతగా రాంరావ్ వడ్కుటేకు మంచి గుర్తింపు ఉంది. సుమారు ఎనిమిది నెలల క్రితమే బీజేపీ అధిష్ఠానం ఆయన్ను రాజ్యసభకు పంపించింది. ఎంపీగా బాధ్యతలు చేపట్టిన కొద్ది నెలల్లోనే ఆయన అకాల మరణం చెందడంతో పార్టీ శ్రేణుల్లో విషాదం నెలకొంది. మహారాష్ట్రలోని ధనగర్ సామాజిక వర్గంలో ఆయన బలమైన నాయకుడిగా కొనసాగారు.
రాంరావ్ వడ్కుటే తన రాజకీయ జీవితంలో పలు కీలక పదవులు నిర్వహించారు. గతంలో నేషనలిస్ట్ కాంగ్రెస్ పార్టీ (ఎన్సీపీ)లో పనిచేసిన ఆయన, మహారాష్ట్ర శాసనమండలి సభ్యుడిగా (MLC) బాధ్యతలు నిర్వర్తించారు.
2019 అక్టోబర్లో ఎన్సీపీకి రాజీనామా చేసి బీజేపీలో చేరారు. 2021లో హింగోలి జిల్లా బీజేపీ అధ్యక్షుడిగా నియమితులయ్యారు.
ఆ తర్వాత హింగోలి లోక్సభ నియోజకవర్గ ఎన్నికల ఇన్ఛార్జ్గా, ఎన్నికల ముఖ్య బాధ్యుడిగా పార్టీ బలోపేతానికి కృషి చేశారు. ‘షెళీ-మెండీ మహాసంఘ్’ (గొర్రెలు, మేకల అభివృద్ధి సమాఖ్య) అధ్యక్షుడిగా కూడా సేవలందించారు. ఆయన మృతి పట్ల బీజేపీ అగ్రనేతలు, మహారాష్ట్ర ప్రజాప్రతినిధులు, కార్యకర్తలు తీవ్ర దిగ్భ్రాంతి వ్యక్తం చేస్తూ సంతాపం తెలిపారు.