భారత్లో ఆర్టిఫిషియల్ ఇంటెలిజెన్స్ (AI) పరిశోధనలను కొత్త శిఖరాలకు తీసుకెళ్లేందుకు మార్గం సుగమం అయ్యింది. ఈ మేరకు టెక్ దిగ్గజం గూగుల్ ప్రతిష్ఠాత్మక ఐఐటీ ఖరగ్పూర్కు ఏకంగా 5 మిలియన్ డాలర్ల (మన కరెన్సీలో రూ.46 కోట్లకు పైగా) భారీ ఆర్థిక సాయాన్ని ప్రకటించింది. దీంతో నెక్స్ట్-జెన్ సైంటిఫిక్, టెక్నాలజీ టాలెంట్ను తీర్చిదిద్దడంతో పాటు.. AI పరిశోధనలను వేగవంతం చేయాలనే లక్ష్యంగా పెట్టుకున్నారు. కాగా గూగుల్ సీఈఓ సుందర్ పిచాయ్ ఈ విద్యాసంస్థలోనే చదువుకున్న పూర్వ విద్యార్థి కావడం విశేషం.
చదువుకున్న సంస్థకు సుందర్ పిచాయ్ భారీ కానుక..
ఐఐటీ ఖరగ్పూర్ 75వ వార్షికోత్సవ వేడుకల సందర్భంగా నిర్వహించిన కార్యక్రమంలో గూగుల్ డైరెక్టర్ సుమన్ చక్రవర్తి ఈ వివరాలను వెల్లడించారు. తాను చదువుకున్న విద్యా సంస్థలో నూతన సాంకేతిక ఆవిష్కరణలు, ప్రాక్టికల్ రీసెర్చ్ను ప్రోత్సహించాలనే పిచాయ్ ఆలోచనతోనే ఈ నిధులు అందిస్తున్నట్లు ఆయన పేర్కొన్నారు. ఈ నిధుల ద్వారా గూగుల్, ఐఐటీ ఖరగ్పూర్ కలిసి ప్రాక్టికల్ రీసెర్చ్ను మరింత విస్తరించనున్నాయి. దేశవ్యాప్తంగా ప్రాంతీయ భాషల డిజిటలైజేషన్, వ్యవసాయ రంగంలో మెరుగైన ఆవిష్కరణలు.. మెటీరియల్ సైన్స్, విద్యా రంగానికి సంబంధించి ఏఐ బేస్డ్ టూల్స్ తయారీ ప్రాజెక్టులలో ఈ పరిశోధనలు కీలకంగా మారనున్నాయి.
మూడు విభాగాలుగా భాగస్వామ్యం..
1. అధునాతన AI పరిశోధనలు: దేశ అవసరాలకు తగ్గట్టుగా ప్రాక్టికల్ రీసెర్చ్ను విస్తరించడం.
2.ఉన్నత విద్యా అవకాశాలు: విద్యార్థులు, అధ్యాపకుల కోసం కొత్త AI ట్రైనింగ్ కోర్సులు, నైపుణ్యాభివృద్ధి కార్యక్రమాలు నిర్వహించడం.
3.మౌలిక సదుపాయాల బలోపేతం: క్యాంపస్ పరిధిలో AI మౌలిక సామర్థ్యాన్ని పెంచడం ద్వారా రీసెర్చ్ స్కాలర్లకు అంతర్జాతీయ స్థాయి సాంకేతిక పరిజ్ఞానం, టూల్స్ అందుబాటులోకి తీసుకురావడం.
ఇక ఐఐటీ ఖరగ్పూర్తో కలిసి పని చేయబోతోండటం పట్ల సుందర్ పిచాయ్ హర్షం వ్యక్తం చేశారు. “ఒకప్పుడు విద్యార్థిగా తన భవిష్యత్తును తీర్చిదిద్దిన ఐఐటీ ఖరగ్పూర్.. ఇప్పుడు రాబోయే తరం విద్యార్థులకు బంగారు బాటలు వేయడానికి తోడ్పాటు అందించడం గర్వకారణం” అని ఆయన పేర్కొన్నారు. భారతీయ భాషలు, వ్యవసాయం, విద్యా రంగాల్లో ఐఐటీ ఖరగ్పూర్ అద్భుతమైన పరిశోధనలు సాగిస్తోందని తెలిపారు. ప్రధాని నరేంద్ర మోదీ ఆకాంక్షలకు అనుగుణంగా AI ఫలాలు దేశంలోని ప్రతి ఒక్కరికీ చేరుతాయని ఆయన ఆశాభావం వ్యక్తం చేశారు.