Seattle Airport ICE Arrest: అమెరికాలోని సియాటెల్-టకోమా అంతర్జాతీయ విమానాశ్రయంలో శనివారం ఉదయం అనూహ్య ఘటన చోటుచేసుకుంది. లాస్ ఏంజెల్స్కు వెళ్లేందుకు ప్రయాణికులు విమానం ఎక్కుతున్న సమయంలో ముసుగులు ధరించిన ఇమ్మిగ్రేషన్ అండ్ కస్టమ్స్ ఎన్ఫోర్స్మెంట్ (ICE) అధికారులు జెట్ బ్రిడ్జిపైకి వచ్చి ఇద్దరిని అదుపులోకి తీసుకున్నారు. ప్రయాణికుల ముందే ఒకరిని నేలపై నుంచి లాక్కెళ్తున్న దృశ్యాలు బయటకు రావడంతో ఈ ఘటన చర్చనీయాంశమైంది.
బోర్డింగ్ సమయంలోనే అరెస్ట్లు

థాంక్స్గివింగ్ సెలవుల నేపథ్యంలో విమానాశ్రయంలో రద్దీ నెలకొన్న సమయంలో ఈ ఘటన జరిగింది. ఉదయం 8.10 గంటలకు బయలుదేరాల్సిన అలస్కా ఎయిర్లైన్స్ ఫ్లైట్ 1306లో ప్రయాణికులు ఎక్కుతుండగా ICE అధికారులు అక్కడికి చేరుకున్నారు. రికార్డో లారోండో మెండోజా అనే మెక్సికో జాతీయుడిని అదుపులోకి తీసుకునేందుకు ఈ ఆపరేషన్ చేపట్టినట్లు అధికారులు తెలిపారు. అధికారులు ఒక వ్యక్తిని నేలపై నుంచి ఈడ్చుకెళ్తున్న దృశ్యాలు సోషల్ మీడియాలో వైరల్ అయ్యాయి. ఆ సమయంలో అక్కడున్న ఓ మహిళ.. తమకు వర్క్ పర్మిట్ ఉందని చెబుతూ అధికారులను వేడుకుంటున్నట్లు వీడియోలో కనిపించింది. అయినప్పటికీ అధికారులు ఇద్దరినీ అక్కడి నుంచి తీసుకెళ్లారు.
మహిళపై కూడా అభియోగాలు?
ICE అధికారుల ప్రకారం.. మెండోజా వీసా గడువు ముగిసిన తర్వాత కూడా అమెరికాలో ఉంటున్నట్లు గుర్తించారు. ఈ ఆపరేషన్ సమయంలో సోఫియా హెర్నాండెజ్ మెజియా అనే మరో మహిళ అధికారులపై వేడి కాఫీ విసిరినట్లు ICE ఆరోపించింది. ఆమె కూడా వీసా గడువు ముగిసిన తర్వాత అమెరికాలో ఉంటున్నట్లు గుర్తించామని అధికారులు తెలిపారు. ఫెడరల్ అధికారిపై దాడికి సంబంధించిన అభియోగాలు ఎదుర్కోవాల్సి రావచ్చని పేర్కొన్నారు.
Seattle Airport ICE Arrest: అలస్కా ఎయిర్లైన్స్ అసంతృప్తి
ఈ ఆపరేషన్ గురించి తమకు ముందస్తు సమాచారం ఇవ్వలేదని అలస్కా ఎయిర్లైన్స్ వెల్లడించింది. విమానం ఎక్కుతున్న ప్రయాణికులు, సిబ్బందికి ఈ ఘటన తీవ్ర అసౌకర్యం కలిగించిందని పేర్కొంది. ఘటనపై విమానాశ్రయాన్ని నిర్వహించే పోర్ట్ ఆఫ్ సియాటెల్తో కలిసి వివరాలు తెలుసుకుంటున్నట్లు తెలిపింది. ఈ పరిణామంతో ఫ్లైట్ 1306 ఆలస్యమైంది. కొంతమంది ప్రయాణికులను ఇతర విమానాల్లోకి మార్చిన తర్వాత అసలు విమానం స్థానిక సమయం ప్రకారం ఉదయం 11 గంటలకు బయలుదేరినట్లు సమాచారం. మరోవైపు, వాషింగ్టన్ రాష్ట్ర గవర్నర్ బాబ్ ఫెర్గూసన్ ICE అధికారుల చర్యలపై తీవ్ర విమర్శలు చేశారు. విమానాశ్రయంలో జరిగిన ఈ ఘటనపై సమగ్ర వివరాలు తెలుసుకోవాలని పోర్ట్ ఆఫ్ సియాటెల్ కూడా పేర్కొంది.