Devanahalli Court: ఆంధ్రప్రదేశ్ కాంగ్రెస్ కమిటీ (APCC) అధ్యక్షురాలు వైఎస్ షర్మిలకు బెంగళూరులోని దేవనహళ్లి న్యాయస్థానంలో గట్టి ఎదురుదెబ్బ తగిలింది. యలహంక ప్రాంతంలోని ఓ వివాదాస్పద స్థలంలోకి వైఎస్ షర్మిల కానీ, ఆమె కుటుంబ సభ్యులు లేదా ప్రతినిధులు కానీ అడుగుపెట్టకుండా కోర్టు మధ్యంతర ఇంజంక్షన్ ఉత్తర్వులు ఇచ్చింది. సిలికాన్ బిల్డర్స్ ప్రైవేట్ లిమిటెడ్ వేసిన సివిల్ దావాపై విచారణ జరిపిన ప్రిన్సిపల్ సీనియర్ సివిల్ జడ్జి కోర్టు, శనివారం (నవంబర్ 21న) ఈ కీలక ఆదేశాలను జారీ చేసింది.

ఆస్తికి నష్టం కలిగించవద్దంటూ స్పష్టమైన ఆదేశాలు
వివాదంలో ఉన్న భూమిలోకి ప్రవేశించడం, అక్కడి కార్యకలాపాలకు ఆటంకం కలిగించడం, లేదా ప్రహరీ గోడలు, కంచె, చెట్లకు ఎటువంటి హాని తలపెట్టడం వంటివి చేయకూడదని న్యాయస్థానం తేల్చిచెప్పింది. పిటిషనర్లు వినిపించిన వాదనలు, సమర్పించిన ప్రాథమిక సాక్ష్యాధారాలను పరిశీలించిన అనంతరం.. ఫిర్యాదుదారులకు పూడ్చలేని నష్టం జరగకుండా నివారించేందుకు ఈ మధ్యంతర ఆదేశాలు తప్పనిసరని జడ్జి అభిప్రాయపడ్డారు. ఈ మేరకు షర్మిలకు నోటీసులు పంపిన కోర్టు, కేసు తదుపరి విచారణను డిసెంబర్ 19వ తేదీకి వాయిదా వేసింది.
Devanahalli Court: 20 ఏళ్ల లీజు ఒప్పందం ఉందన్న సిలికాన్ బిల్డర్స్
బెంగళూరు ఉత్తర తాలూకా, జాలా హోబ్లీ పరిధిలోని కట్టిగేనహళ్లి గ్రామంలో ఉన్న సదరు ఆస్తిని తాము 2007 మార్చి 1 నుంచి లీజుకు తీసుకున్నామని సిలికాన్ బిల్డర్స్ సంస్థ కోర్టుకు తెలిపింది. ఈ లీజు గడువు 2027 ఫిబ్రవరి 28 వరకు కొనసాగుతుందని పేర్కొంది. తాము క్రమం తప్పకుండా అద్దెలు చెల్లిస్తున్నప్పటికీ, గతంలో తాత్కాలిక అనుమతితో అక్కడ నివసించిన షర్మిల, ప్రస్తుతం ఇతరుల సాయంతో ఆ ఆస్తిని ఆక్రమించుకోవాలని చూస్తున్నారని ఆరోపించింది. తమ వాదనకు బలం చేకూరుస్తూ లీజు పత్రాలు, అద్దె రసీదులు, కరెంట్ బిల్లులను కోర్టు ముందుంచింది.
రాజకీయ వర్గాల్లో చర్చ.. న్యాయ నిపుణుల విశ్లేషణ
ఈ ఆస్తి వ్యవహారం మాజీ ముఖ్యమంత్రి వైఎస్ జగన్ మోహన్ రెడ్డి కుటుంబానికి సంబంధించినది కావడంతో సర్వత్రా ఆసక్తి నెలకొంది. మరోవైపు, షర్మిల కుమార్తె వివాహ ఏర్పాట్లు జరుగుతున్న సమయంలో ఈ కోర్టు ఉత్తర్వులు రావడం రాజకీయ వర్గాల్లో చర్చకు దారితీసింది. అయితే, ఇది కేవలం ఆస్తి స్వాధీనానికి (పొసెషన్) సంబంధించిన సివిల్ కేసు మాత్రమేనని, యాజమాన్య హక్కులపై ఇచ్చిన తుది తీర్పు కాదని న్యాయ నిపుణులు స్పష్టం చేస్తున్నారు. డిసెంబర్ 19న జరిగే విచారణలో షర్మిల తరఫు న్యాయవాదులు తమ వాదనలను కోర్టుకు సమర్పించనున్నారు.