Onion Prices: నిత్యావసర వస్తువుల ధరలు ఆకాశాన్ని తాకుతుండటంతో మధ్యతరగతి, సామాన్య ప్రజల నెలవారీ ఆర్థిక ప్రణాళికలు పూర్తిగా గతి తప్పుతున్నాయి. రోజువారీ వంటగది అవసరాలకే అధిక మొత్తం ఖర్చు చేయాల్సి రావడంతో ఇతర ఖర్చులను తగ్గించుకోవాల్సిన పరిస్థితి ఏర్పడింది.

హైదరాబాద్, ఏపీలో కూరగాయల ధరల భారం
తాజా గణాంకాల ప్రకారం అక్టోబర్ నెలలో హైదరాబాద్ మార్కెట్లో ఉల్లి ధర ఏకంగా 116.22 శాతం మేర ఎగబాకింది. ఇదే సమయంలో వెల్లుల్లి ధర 60.74 శాతం, అల్లం ధర 48.32 శాతం పెరగడం వినియోగదారులకు పెద్ద షాక్ ఇచ్చింది. ఆంధ్రప్రదేశ్లోనూ దాదాపు ఇదే తరహా ధరల పెరుగుదల కనిపిస్తోంది. కొందరు వ్యాపారులు మార్కెట్లో కృత్రిమ కొరతను సృష్టించి, అధిక లాభాల కోసం సరుకులను ఎక్కువ ధరలకు అమ్ముతున్నారన్న విమర్శలు వినిపిస్తున్నాయి.
Onion Prices: ద్రవ్యోల్బణం పెరుగుదల.. ఆలుగడ్డకు కాస్త ఊరట
మరోవైపు రిటైల్ ద్రవ్యోల్బణం 6.09 శాతానికి చేరగా, ఇంధన ద్రవ్యోల్బణం ఏకంగా 32.84 శాతానికి ఎగసింది. రవాణా, ఇంధన ఖర్చులు పెరగడం కూడా నిత్యావసరాల ధరలపై పరోక్షంగా ప్రభావం చూపుతోంది. అయితే ఇన్ని ధరల పెరుగుదల మధ్య ఆలుగడ్డ ధర మాత్రం 14.24 శాతం తగ్గడం వినియోగదారులకు కొంత ఊరట కలిగించే అంశంగా నిలిచింది.