El Chapo Isidro : మెక్సికో దేశానికి చెందిన డ్రగ్ డాన్ (Drug Don), ఫెడరల్ బ్యూరో ఆఫ్ ఇన్వెస్టిగేషన్ (FBI) మోస్ట్ వాంటెడ్ జాబితాలో ఉన్న ఎల్ చాపో ఇసిద్రో (El Chapo Isidro) అరెస్టయ్యాడు. మెక్సికో ప్రత్యేక భద్రతా బలగాలు, అమెరికా-మెక్సికో ఆర్మీ చేపట్టిన సంయుక్త ఆపరేషన్లో అతడు పట్టుబడినట్లు సమాచారం. ఈ సందర్భంగా మెక్సికన్ సైన్యానికి, సాయుధ మిలిటెంట్లకు మధ్య కాల్పులు చోటుచేసుకున్నట్లు తెలిసింది.
శుక్రవారం సినలోవాలో ఎల్ చాపోను పట్టుకున్నట్లు వార్తలు వస్తున్నప్పటికీ ఇంకా అధికారిక ప్రకటన రావాల్సి ఉంది. నేరపూరిత కార్యకలాపాలు సాగిస్తున్న మెజా ఫ్లోరెస్ అనే సంస్థకు ఇసిద్రో నాయకత్వం వహిస్తున్నట్లు ఆరోపణలు ఉన్నాయి. అతడు తలదాచుకున్నట్లు భావిస్తున్న సినలోవాలోని గువాసేవ్ ప్రాంతంలో భద్రతాబలగాలు కాల్పులు జరుపుతున్న వీడియోలు వైరల్ అవుతున్నాయి.
ఎల్ చాపో అరెస్టు వార్తల నేపథ్యంలో మెక్సికోలో పలుచోట్ల హింసాత్మక ఘటనలు చోటుచేసుకున్నాయి. ఆందోళనకారులు రోడ్లను దిగ్బంధించి వాహనాలకు నిప్పుపెట్టారు. భారీ మొత్తంలో మాదకద్రవ్యాలను అక్రమంగా రవాణా చేస్తున్నట్లు కూడా ఇసిద్రోపై ఆరోపణలు ఉన్నాయి. మాదకద్రవ్యాల అక్రమ రవాణా ముఠాలతో సంబంధాలు పెంపొందించుకొని, ఆపై సొంతంగా ఓ ముఠా ఏర్పాటు చేసుకొని ఇసిద్రో కీలక నాయకుడిగా ఎదిగాడు.
ఇసిద్రో అమెరికాలోకి కొకైన్, మెథాంఫెటమైన్, హెరాయిన్ లాంటి మాదక ద్రవ్యాలను చేరవేస్తున్నాడనే ఆరోపణలతో గత ఏడాది ఫిబ్రవరి 4న ఎఫ్బీఐ మోస్ట్ వాంటెడ్ నిందితుల జాబితాలో చేర్చింది. అతడిపై ఐదు మిలియన్ డాలర్ల రివార్డు కూడా ఉంది.