Maharashtra: మహారాష్ట్రలోని గోండియా జిల్లాలో జరిగిన ఎయిర్లైన్ ఉద్యోగిని హత్య కేసులో సంచలన విషయాలు వెలుగులోకి వచ్చాయి. నవంబర్ 14న అటవీ ప్రాంతంలో రక్తపు మడుగులో శవమై కనిపించిన 35 ఏళ్ల వర్ష తుర్కర్ను, ఆమె స్నేహితుడి భార్యే కిరాయి హంతకులతో హత్య చేయించినట్లు పోలీసుల విచారణలో తేలింది. ఈ కేసును ఛేదించిన పోలీసులు ప్రధాన సూత్రధారి మోనా అగర్వాల్ సహా నలుగురు నిందితులను గురువారం అరెస్ట్ చేశారు.

అసలేం జరిగింది?
పుణె జిల్లా ధనోరి ప్రాంతానికి చెందిన వర్ష తుర్కర్, దీపావళి సెలవుల కోసం మధ్యప్రదేశ్లోని బాలాఘాట్ జిల్లా కిన్హి గ్రామంలో ఉన్న తన పుట్టింటికి వచ్చారు. ఈ క్రమంలో నవంబర్ 14న తన స్నేహితుడు నితేశ్ అగర్వాల్తో కలిసి కారులో గోండియాలోని తిరోడాకు వెళ్లారు. తిరిగి వస్తుండగా సాయంత్రం 5:30 నుంచి 6 గంటల మధ్య దవనివాడ పోలీస్ స్టేషన్ పరిధిలోని బోంద్రణి గ్రామ అటవీ ప్రాంతంలో గల శివాలయం వద్ద వీరి కారు ఆగింది. అక్కడికి చేరుకున్న ముగ్గురు గుర్తుతెలియని వ్యక్తులు వర్షపై కత్తులతో దాడి చేసి, పొట్టలో, వీపుపై విచక్షణారహితంగా పొడిచి హత్య చేశారు.
200 సీసీటీవీ కెమెరాలతో వీడిన మిస్టరీ
ఈ హత్య కేసును ఛేదించేందుకు ఆరు ప్రత్యేక పోలీసు బృందాలు రంగంలోకి దిగాయి. నాలుగు రోజుల పాటు తిరోడా, ఖైర్లాంజి, వారసెయోని, బాలాఘాట్, గోండియా మార్గాల్లోని సుమారు 200 సీసీటీవీ కెమెరాల ఫుటేజీని పోలీసులు జల్లెడ పట్టారు. నితేశ్ అగర్వాల్ కారును ముగ్గురు వ్యక్తులు బైక్పై వెంబడించినట్లు ఫుటేజీలో స్పష్టమైంది. సాంకేతిక ఆధారాలు, నిఘా సమాచారంతో నవంబర్ 19న గోండియాలోని మూర్తి గ్రామానికి చెందిన ఇమ్రాన్ కరీం షేక్ (26) అనే అనుమానితుడిని అదుపులోకి తీసుకుని ప్రశ్నించగా, హత్య వెనుక అసలు కుట్ర బయటపడింది.
జీపీఎస్ ట్రాకింగ్తో మాటువేసి హత్య
తన భర్త నితేశ్ అగర్వాల్కు వర్షతో వివాహేతర సంబంధం ఉందన్న అనుమానంతో నితేశ్ భార్య మోనా అగర్వాల్ (41) రగిలిపోయింది. వర్షను అడ్డు తొలగించుకోవాలని నిర్ణయించుకుని, ఇంటి సమీపంలో ఉండే కునాల్ కుంభాల్కర్ సహాయం కోరింది. కునాల్ నేర చరిత్ర కలిగిన షారుఖ్ పఠాన్ అనే వ్యక్తిని కలిసి, వర్షను హత్య చేసేందుకు రూ.13 లక్షలకు సుపారీ కుదుర్చుకున్నాడు.
షారుఖ్ పఠాన్ ఈ పని కోసం మూర్తి ప్రాంతానికి చెందిన ఇమ్రాన్ షేక్ (26), నలేన్ అలియాస్ నైలాన్ షేక్ (24), క్రిష్ రౌత్ (19)లను రంగంలోకి దించాడు. నితేశ్ వాడుతున్న కారు భార్య మోనా పేరు మీద రిజిస్టర్ అయి ఉండటంతో పాటు, దానికి జీపీఎస్ ట్రాకింగ్ సదుపాయం ఉంది. దీని ద్వారా నితేశ్ కదలికలను ఎప్పటికప్పుడు కనిపెట్టిన నిందితులు, బైక్పై కారును వెంబడించి బోంద్రణి అటవీ ప్రాంతంలో వర్షపై దాడి చేసి హత్య చేశారు.
మోనా అగర్వాల్ సహా నలుగురు నిందితులను అరెస్ట్ చేసి, తదుపరి విచారణ కోసం దవనివాడ పోలీసులకు అప్పగించినట్లు అధికారులు తెలిపారు. పరారీలో ఉన్న మరో ఇద్దరు నిందితుల కోసం గాలింపు చర్యలు కొనసాగుతున్నాయని వెల్లడించారు.