Andaman Jail: భారత స్వాతంత్ర్య సమరయోధుల త్యాగాలకు సాక్ష్యంగా నిలిచిన చారిత్రక ‘సెల్యులార్ జైలు’ (కాలా పానీ) కొలువైన అండమాన్ నికోబార్ దీవుల జైళ్ల చరిత్రలో ఒక కీలక మలుపు చోటుచేసుకోనుంది. వలసవాద కాలం నాటి కఠిన చట్టాలకు కాలం చెల్లిస్తూ, జైలు పరిపాలనను ఆధునీకరించేందుకు కేంద్రపాలిత ప్రాంత యంత్రాంగం నడుం బిగించింది.
కేవలం నేరస్థులకు శిక్ష విధించడమే కాకుండా, వారిలో మానసిక పరివర్తన తీసుకువచ్చి తిరిగి సమాజంలో గౌరవప్రదంగా బతికేలా తీర్చిదిద్దే లక్ష్యంతో ‘అండమాన్ నికోబార్ దీవుల జైళ్లు మరియు సంస్కరణ సేవల నిబంధన, 2026’ను ప్రవేశపెట్టనుంది.
బ్రిటిష్ చట్టాలకు స్వస్తి.. మానవీయ కోణంలో అడుగులు
భారత రాజ్యాంగంలోని ఆర్టికల్ 240 కింద రూపొందించిన ఈ నూతన నిబంధన ద్వారా, దశాబ్దాలుగా అమల్లో ఉన్న మూడు పాత చట్టాలు పూర్తిగా రద్దు కానున్నాయి.
1894 నాటి బ్రిటిష్ కాలం జైళ్ల చట్టం
1900 నాటి ఖైదీల చట్టం
1950 నాటి ఖైదీల బదిలీ చట్టం
ఖైదీల మానవ హక్కులు, ఆత్మగౌరవం మరియు సంక్షేమానికి అత్యంత ప్రాధాన్యతనిస్తూ, జైళ్లను కేవలం బందీఖానాలుగా కాకుండా సంస్కరణ కేంద్రాలుగా మార్చడమే ఈ కొత్త చట్టం ప్రధాన ఉద్దేశం.
ఖైదీల భవిష్యత్తుకు భరోసా: విద్య, నైపుణ్య శిక్షణ
ఖైదీలు తమ శిక్షా కాలాన్ని పూర్తి చేసుకుని బయటకు వచ్చిన తర్వాత, సమాజంలో తలెత్తుకుని జీవించేలా ఈ చట్టంలో విప్లవాత్మక మార్పులు తీసుకువచ్చారు:
ఓపెన్ జైళ్లు: సత్ప్రవర్తన కలిగిన అర్హులైన ఖైదీలలో దశలవారీగా మార్పు తీసుకురావడానికి ‘ఓపెన్’ మరియు ‘సెమీ-ఓపెన్’ జైళ్లను ఏర్పాటు చేయనున్నారు.
ఉపాధి కల్పన: జైలు జీవితం తర్వాత వారికి మెరుగైన ఉపాధి అవకాశాలు లభించేలా లోపలే చదువుకునే అవకాశం, వృత్తిపరమైన శిక్షణ, వివిధ నైపుణ్యాభివృద్ధి కార్యక్రమాలను అందించనున్నారు.
హైటెక్ నిఘా.. కట్టుదిట్టమైన భద్రత
ఒకవైపు ఖైదీల సంక్షేమానికి పెద్దపీట వేస్తూనే, మరోవైపు జైళ్లలో భద్రత విషయంలో ఏమాత్రం రాజీ పడకుండా ఆధునిక సాంకేతికతను రంగంలోకి దించుతున్నారు.
జైలు ఆవరణలో నిరంతర నిఘా కోసం సీసీటీవీ కెమెరాలు, ఖైదీల కదలికలను పర్యవేక్షించేందుకు బయోమెట్రిక్ మరియు ఆర్ఎఫ్ఐడీ వ్యవస్థలను ప్రవేశపెడుతున్నారు.
ఖైదీల వివరాలన్నీ పారదర్శకంగా ఉండేలా డిజిటల్ రికార్డులు, కోర్టు విచారణల కోసం వీడియో కాన్ఫరెన్సింగ్ సదుపాయాలు మరియు అక్రమ కమ్యూనికేషన్లను అడ్డుకునేందుకు మొబైల్ ఫోన్ జామర్లను ఏర్పాటు చేయనున్నారు.
జైలులో సెల్ఫోన్ దొరికితే మూడేళ్ల అదనపు జైలు!
జైలు గోడల వెనుక నుంచే నేర సామ్రాజ్యాన్ని నడిపించే వ్యవస్థీకృత ముఠాల ఆటకట్టించేందుకు కొత్త నిబంధనలో కఠిన కొరడా ఝుళిపించారు. జైలు లోపల నిషేధిత మొబైల్ ఫోన్లు గానీ, ఇతర కమ్యూనికేషన్ పరికరాలు గానీ కలిగి ఉన్నట్లు తేలితే, వారికి అదనంగా మూడేళ్ల వరకు జైలు శిక్ష విధించేలా కఠిన నిబంధనలను రూపొందించారు.