Donald Trump : అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలతో అంతర్జాతీయ రాజకీయాల్లో చర్చకు తెరలేపారు. అమెరికా, చైనా దేశాలు పరస్పరం గూఢచర్యం చేసుకుంటున్నాయని ఆయన బహిరంగంగా వెల్లడించారు. చైనా తమపై నిఘా పెడుతోందని, తాము కూడా చైనాపై నిఘా కొనసాగిస్తున్నామని పేర్కొన్నారు. అయితే ఈ విషయంలో చైనా కంటే అమెరికానే మెరుగ్గా పనిచేస్తోందని వ్యాఖ్యానించారు. చైనా అధ్యక్షుడు షీ జిన్పింగ్తో భేటీకి ముందు మీడియా ప్రతినిధులతో మాట్లాడిన ట్రంప్ ఈ వ్యాఖ్యలు చేశారు. ప్రపంచంలోని రెండు అగ్ర ఆర్థిక శక్తులైన అమెరికా, చైనా మధ్య ఇప్పటికే వాణిజ్యం, సాంకేతికత, రక్షణ రంగాల్లో పోటీ కొనసాగుతోంది. ఈ నేపథ్యంలో ఇరు దేశాలు గూఢచర్యానికి పాల్పడుతున్నాయంటూ ట్రంప్ చేసిన వ్యాఖ్యలు అంతర్జాతీయ స్థాయిలో ప్రాధాన్యత సంతరించుకున్నాయి.

ఇరాన్కు చైనా సాయం చేస్తోందన్న ఆరోపణలను ఖండించిన ట్రంప్
ఇరాన్తో కొనసాగుతున్న ఉద్రిక్తతల నేపథ్యంలో చైనా పాత్రపై కూడా ట్రంప్ స్పందించారు. యుద్ధంలో ఇరాన్కు చైనా సహాయం చేస్తోందంటూ వస్తున్న ఆరోపణలను ఆయన తోసిపుచ్చారు. మరోవైపు జెన్సన్ వ్యవహారంపై మీడియా ప్రశ్నించగా, అలిస్ గూఢచారి అని తాను ఎప్పుడూ వినలేదని పేర్కొన్నారు. ట్రంప్ వ్యాఖ్యలు అమెరికా-చైనా సంబంధాల్లో గూఢచర్యం, జాతీయ భద్రత వంటి అంశాలు ఎంత కీలకంగా మారాయో స్పష్టం చేస్తున్నాయి. ముఖ్యంగా జిన్పింగ్తో సమావేశానికి ముందు ఈ వ్యాఖ్యలు చేయడం దౌత్యపరంగా ఆసక్తికరంగా మారింది. ఇరు దేశాల మధ్య పరస్పర అనుమానాలు, వ్యూహాత్మక పోటీ భవిష్యత్తులో ఎలాంటి పరిణామాలకు దారితీస్తాయన్నది అంతర్జాతీయ రాజకీయ వర్గాల్లో చర్చనీయాంశంగా మారింది.