Ghatkesar Crime: హైదరాబాద్ నగర శివారు ఘట్కేసర్ పరిధిలో దారుణ ఘటన చోటుచేసుకుంది. డబ్బుల విషయంలో తలెత్తిన వివాదం, వ్యక్తిగత కక్షల నేపథ్యంలో 17 ఏళ్ల బాలుడు తన బంధువును హత్య చేసినట్లు పోలీసులు తెలిపారు. బండరాయితో తలపై దాడి చేయడంతో బాధితుడు అక్కడికక్కడే మృతి చెందాడు. ఈ ఘటనకు సంబంధించి నిందితుడైన మైనర్ను పోలీసులు అదుపులోకి తీసుకున్నారు.
డబ్బుల విషయంలో తరచూ గొడవలు
పోలీసుల కథనం ప్రకారం.. ఆంధ్రప్రదేశ్లోని పల్నాడు జిల్లా సత్తెనపల్లికి చెందిన 17 ఏళ్ల బాలుడు పని కోసం హైదరాబాద్కు వచ్చాడు. ఘట్కేసర్ పరిధిలోని అవుషాపూర్లో ఓ భవనంలో వాచ్మెన్గా పనిచేస్తూ, తన బంధువైన శివ వద్ద ఉంటున్నాడు. ఈ క్రమంలో గత కొన్ని రోజులుగా ఇద్దరి మధ్య డబ్బుల విషయంలో తరచూ వివాదాలు జరుగుతున్నాయి. ఒక సందర్భంలో శివ.. బాలుడి తల్లిని దూషించడంతో ఇద్దరి మధ్య మనస్పర్థలు మరింత పెరిగినట్లు సమాచారం.
మద్యం సేవించిన తర్వాత మళ్లీ వాగ్వాదం

ఆదివారం ఇద్దరూ కలిసి మద్యం సేవించారు. అనంతరం మరోసారి వారి మధ్య వాగ్వాదం చోటుచేసుకుంది. ఈ క్రమంలో తీవ్ర ఆగ్రహానికి గురైన బాలుడు బండరాయితో శివ తలపై దాడి చేసినట్లు పోలీసులు వెల్లడించారు. తీవ్ర గాయాలతో శివ అక్కడికక్కడే మృతి చెందాడు.
Ghatkesar Crime: మైనర్ను అదుపులోకి తీసుకున్న పోలీసులు
ఘటన అనంతరం బాలుడు అక్కడి నుంచి వెళ్లిపోయాడు. సమాచారం అందుకున్న పోలీసులు కేసు నమోదు చేసి దర్యాప్తు ప్రారంభించారు. నిందితుడైన 17 ఏళ్ల మైనర్ను నిన్న సాయంత్రం అదుపులోకి తీసుకున్నారు. ఘటనకు సంబంధించిన పూర్తి వివరాలపై పోలీసులు తదుపరి విచారణ కొనసాగిస్తున్నారు.