Anticipatory bail for Dr. Padmaja: హైదరాబాద్లో వెలుగుచూసిన అక్రమ అండాల సేకరణ, విక్రయ వ్యవహారం కీలక మలుపు తిరిగింది. ఈ కేసులో డాక్టర్ పి. పద్మజ పాత్ర కీలకంగా ఉందని పోలీసులు హైకోర్టుకు సమర్పించిన కౌంటర్లో వెల్లడించారు. ఆమెకు ముందస్తు బెయిల్ మంజూరు చేయవద్దని న్యాయస్థానాన్ని కోరారు. మహిళలను ప్రలోభపెట్టి హైదరాబాద్కు తీసుకొచ్చి, నిబంధనలకు విరుద్ధంగా అండాల సేకరణకు ఏర్పాట్లు చేసినట్లు దర్యాప్తులో గుర్తించామని వివరించారు. ఈ వ్యవహారంలో పలువురు మధ్యవర్తులు, ఫెర్టిలిటీ సెంటర్ల ప్రమేయం ఉన్నట్లు పోలీసులు అనుమానిస్తున్నారు. అక్రమ అండాల విక్రయ వ్యవహారానికి సంబంధించి సరూర్నగర్, బేగంపేట పోలీసులు వేర్వేరుగా కేసులు నమోదు చేశారు. ఈ కేసుల్లో తనను అరెస్టు చేయకుండా ముందస్తు బెయిల్ మంజూరు చేయాలని డాక్టర్ పి. పద్మజ హైకోర్టును ఆశ్రయించారు. జస్టిస్ నందికొండ నర్సింగ్రావు ఈ పిటిషన్లపై విచారణ చేపట్టారు. ఈ సందర్భంగా పోలీసులు తమ కౌంటర్ దాఖలు చేసి, దర్యాప్తులో వెల్లడైన అంశాలను న్యాయస్థానం దృష్టికి తీసుకెళ్లారు. ఈ వ్యవహారంలో డాక్టర్ పద్మజ కీలక పాత్ర పోషించారని, ఆమెకు ముందస్తు బెయిల్ ఇస్తే దర్యాప్తునకు ఆటంకం కలిగే అవకాశం ఉందని పోలీసులు అభ్యంతరం వ్యక్తం చేశారు. తదుపరి విచారణను ఈ నెల 19వ తేదీకి వాయిదా వేశారు.

Anticipatory bail for Dr. Padmaja: 15 మంది మహిళలను హైదరాబాద్కు తీసుకొచ్చినట్లు గుర్తింపు
గత నెలలో హైదరాబాద్లోని ఓ వర్కింగ్ హాస్టల్లో పోలీసులు తనిఖీలు నిర్వహించారు. ఈ సందర్భంగా వివిధ రాష్ట్రాలకు చెందిన 15 మంది మహిళలను అక్కడికి తీసుకొచ్చినట్లు గుర్తించారు. వీరితో అండాల దానం చేయించేందుకు అవసరమైన ఏర్పాట్లు చేసినట్లు పోలీసులు తమ కౌంటర్లో పేర్కొన్నారు. ఈ ప్రక్రియకు డాక్టర్ పద్మజ ఏర్పాట్లు చేసినట్లు దర్యాప్తులో వెల్లడైందని తెలిపారు. మహిళలకు అండాల దానం ద్వారా డబ్బులు వస్తాయని ఆశ చూపించి ఈ వ్యవహారంలోకి తీసుకొచ్చినట్లు పోలీసులు అనుమానిస్తున్నారు. బాధిత మహిళల పరిస్థితులు, వారికి ఇచ్చిన హామీలు, అండాల సేకరణకు సంబంధించిన ఏర్పాట్లపై అధికారులు వివరాలు సేకరించారు. ఈ వ్యవహారంలో దుర్గాప్రసాద్ అనే వ్యక్తి బ్రోకర్గా వ్యవహరించినట్లు పోలీసులు వెల్లడించారు. ఒక్కో అండానికి రూ.20 వేల నుంచి రూ.30 వేల వరకు చెల్లిస్తామని మహిళలకు ఆశ చూపించినట్లు ఆరోపించారు.ఈ హామీతో వివిధ రాష్ట్రాలకు చెందిన మహిళలను హైదరాబాద్కు రప్పించినట్లు దర్యాప్తులో గుర్తించారు. మహిళలను ఫెర్టిలిటీ సెంటర్లకు తీసుకెళ్లడం, అండాల దాన ప్రక్రియకు అవసరమైన ఏర్పాట్లు చేయడం వంటి పనుల్లో మధ్యవర్తులు కీలకంగా వ్యవహరించినట్లు పోలీసులు పేర్కొన్నారు. సరూర్నగర్లోని షెట్టీ వర్కింగ్ హాస్టల్లో తనిఖీలు నిర్వహించిన పోలీసులు పలు కీలక ఆధారాలను సేకరించారు.