Karreguttalu: తెలంగాణ-ఛత్తీస్గఢ్ సరిహద్దుల్లోని అటవీ ప్రాంతంలో భద్రతా బలగాలు భారీ ఆయుధ డంప్ను గుర్తించాయి. భద్రాద్రి కొత్తగూడెం జిల్లా చర్లకు చెందిన పోలీసులు, గ్రేహౌండ్స్ బలగాలతో కలిసి నిర్వహించిన కూంబింగ్ ఆపరేషన్లో మావోయిస్టులకు సంబంధించినట్లు భావిస్తున్న ఆయుధ నిల్వలు బయటపడ్డాయి. బీజాపూర్ జిల్లా పూజారి కాంకేర్ సమీపంలోని కర్రెగుట్టల్లో ఈ డంప్ను స్వాధీనం చేసుకున్నట్లు పోలీసులు వెల్లడించారు.
300కు పైగా బ్యారెల్ గ్రనేడ్ లాంచర్లు
అటవీ ప్రాంతంలో రహస్యంగా దాచిన ఈ ఆయుధ డంప్లో 300కు పైగా బ్యారెల్ గ్రనేడ్ లాంచర్లు ఉన్నట్లు పోలీసులు గుర్తించారు. భారీ సంఖ్యలో ఆయుధాలు లభించడంతో భద్రతా బలగాలు అప్రమత్తమయ్యాయి. సరిహద్దు ప్రాంతాల్లో మావోయిస్టుల కదలికలపై నిఘాను మరింత పెంచినట్లు అధికారులు తెలిపారు.
తెలంగాణ పోలీసుల చరిత్రలో తొలిసారి?
ఈ ఆపరేషన్ వివరాలను వెల్లడించేందుకు చర్ల పోలీస్ స్టేషన్లో మీడియా సమావేశం నిర్వహించారు. ఈ సందర్భంగా భద్రాద్రి కొత్తగూడెం జిల్లా ఎస్పీ రోహిత్రాజు మాట్లాడుతూ.. తెలంగాణ పోలీసులు ఇంత పెద్ద సంఖ్యలో బ్యారెల్ గ్రనేడ్ లాంచర్లను స్వాధీనం చేసుకోవడం ఇదే తొలిసారి అని పేర్కొన్నారు. అటవీ ప్రాంతాల్లో మావోయిస్టుల కదలికలను అడ్డుకునేందుకు భద్రతా బలగాలు నిరంతరం నిఘా కొనసాగిస్తున్నాయని ఆయన తెలిపారు. ఈ మీడియా సమావేశంలో డీఎస్పీ అరుణ్కుమార్, సీఐ రాజువర్మ, సీఆర్పీఎఫ్ 141వ బెటాలియన్ అసిస్టెంట్ కమాండెంట్ విక్రమ్ రంజన్, ఎస్సై నర్సిరెడ్డి తదితరులు పాల్గొన్నారు.
Karreguttalu: సరిహద్దు ప్రాంతాల్లో భద్రత కట్టుదిట్టం
తెలంగాణ, ఛత్తీస్గఢ్ సరిహద్దుల్లోని అటవీ ప్రాంతాల్లో మావోయిస్టుల కదలికలను గుర్తించేందుకు పోలీసులు, భద్రతా బలగాలు కూంబింగ్ ఆపరేషన్లు కొనసాగిస్తున్నాయి. తాజా ఆయుధ డంప్ స్వాధీనం నేపథ్యంలో సరిహద్దు ప్రాంతాల్లో నిఘా మరింత కట్టుదిట్టం చేసినట్లు అధికారులు వెల్లడించారు.