Jio Recharge: రీఛార్జ్ ధరలు పెరుగుతున్న నేపథ్యంలో చాలామంది మొబైల్ వినియోగదారులు తమ సెకండరీ సిమ్లకు రీఛార్జ్ చేయకుండా కేవలం ఇన్కమింగ్ కాల్స్ కోసం ఉపయోగిస్తున్నారు. అయితే అలాంటి జియో వినియోగదారులకు సంస్థ నుంచి హెచ్చరికలు అందుతున్నట్లు వార్తలు వస్తున్నాయి. రీఛార్జ్ ప్లాన్ గడువు ముగిసిన తర్వాత ఇన్కమింగ్ కాల్స్ కూడా ఎప్పుడైనా నిలిచిపోవచ్చని జియో నుంచి మెసేజ్లు వస్తున్నట్లు పలువురు సోషల్ మీడియాలో పోస్టులు చేస్తున్నారు. ఈ నేపథ్యంలో జియో అధికారిక నిబంధనలు మరోసారి చర్చకు వచ్చాయి.
సోషల్ మీడియాలో వైరల్ అవుతున్న SMS
ఎక్స్ (X) వేదికగా ఓ వినియోగదారు జియో నుంచి వచ్చినట్లు చెబుతున్న SMS స్క్రీన్షాట్ను షేర్ చేశారు. అందులో ‘మీ జియో రీఛార్జ్ ప్లాన్ గడువు ముగిసింది. ఇన్కమింగ్ కాల్స్ ఎప్పుడైనా నిలిచిపోవచ్చు. కనెక్ట్ అయి ఉండటానికి వెంటనే రీఛార్జ్ చేసుకోండి’ అనే హెచ్చరిక ఉన్నట్లు తెలుస్తోంది. ఈ మెసేజ్లో ఇన్కమింగ్ కాల్స్ ఎప్పుడు నిలిచిపోతాయనే ఖచ్చితమైన తేదీ లేదా సమయాన్ని పేర్కొనలేదు. అలాగే ఇన్కమింగ్ SMSలపై ఎలాంటి స్పష్టత ఇవ్వలేదు. దీంతో రీఛార్జ్ గడువు ముగిసిన తర్వాత కూడా సిమ్ను కొనసాగిస్తున్న వినియోగదారుల్లో ఆందోళన నెలకొంది.
రీఛార్జ్ గడువు ముగిశాక జియో నిబంధనలు ఏం చెబుతున్నాయి?
జియో అధికారిక ప్రీపెయిడ్ ప్లాన్ నిబంధనల ప్రకారం.. రీఛార్జ్ వ్యాలిడిటీ ముగిసిన తర్వాత కనీసం 15 రోజుల పాటు ఇన్కమింగ్ కాల్స్, ఇన్కమింగ్ SMSలు అందుబాటులో ఉంటాయి. ఈ గడువు పూర్తయిన తర్వాత సంస్థ తన విచక్షణ మేరకు ఈ సేవలను ఎప్పుడైనా నిలిపివేయవచ్చు. అంటే రీఛార్జ్ గడువు ముగిసిన వెంటనే ఇన్కమింగ్ కాల్స్ ఆగిపోవు. అయితే 15 రోజుల తర్వాత కూడా తప్పనిసరిగా సేవలు కొనసాగుతాయనే హామీ లేదు. అందువల్ల సెకండరీ సిమ్ వినియోగదారులు ఈ విషయాన్ని గుర్తుంచుకోవాలి.

90 రోజుల నిబంధన ఏంటి?
టెలికాం రెగ్యులేటరీ అథారిటీ ఆఫ్ ఇండియా (TRAI) నిబంధనల ప్రకారం.. ప్రీపెయిడ్ మొబైల్ నంబర్ను కేవలం వినియోగం లేకపోయిందనే కారణంతో కనీసం 90 రోజుల వ్యవధి పూర్తికాకుండా డీయాక్టివేట్ చేయకూడదు. ఇన్కమింగ్ లేదా అవుట్గోయింగ్ వాయిస్ కాల్, వీడియో కాల్, అవుట్గోయింగ్ SMS, డేటా వినియోగం వంటి కార్యకలాపాలను వినియోగంగా పరిగణిస్తారు. జియో నిబంధనల ప్రకారం కూడా వరుసగా 90 రోజుల పాటు ఎలాంటి వినియోగం లేకపోవడం, మెయిన్ అకౌంట్ బ్యాలెన్స్ రూ.20 కంటే తక్కువగా ఉండటం వంటి పరిస్థితుల్లో సంస్థ నంబర్ను డీయాక్టివేట్ చేయవచ్చు. అలాంటి సందర్భంలో నంబర్ను తిరిగి పొందేందుకు 15 రోజుల రీయాక్టివేషన్ గడువు, రూ.20 రుసుము వర్తించే అవకాశం ఉంది.
రూ.20 కంటే ఎక్కువ బ్యాలెన్స్ ఉంటే?
ప్రీపెయిడ్ అకౌంట్లో రూ.20 లేదా అంతకంటే ఎక్కువ బ్యాలెన్స్ ఉంటే జియో ఆటోమేటిక్ నంబర్ రిటెన్షన్ విధానాన్ని అమలు చేయవచ్చు. ఇందులో ప్రతి 30 రోజులకు రూ.20 చొప్పున కట్ చేసి నంబర్ను మరో 30 రోజుల పాటు కొనసాగించే అవకాశం ఉంటుంది. అయితే జియో నిబంధనల్లో మరో ముఖ్యమైన అంశం కూడా ఉంది. చివరి రీఛార్జ్ గడువు ముగిసినప్పటి నుంచి 180 రోజులు పూర్తయినా కొత్త రీఛార్జ్ చేయకపోతే, మధ్యలో వినియోగం ఉన్నప్పటికీ నంబర్ను డీయాక్టివేట్ చేసే హక్కు సంస్థకు ఉంటుంది.
Jio Recharge: జియో యూజర్లు ఏం చేయాలి?
ఇన్కమింగ్ కాల్స్, SMSల కోసం మాత్రమే జియో సిమ్ను ఉపయోగిస్తున్నవారు తమ రీఛార్జ్ గడువును గమనించాలి. సిమ్లో ముఖ్యమైన బ్యాంకింగ్ OTPలు, వ్యక్తిగత కాల్స్ వస్తుంటే రీఛార్జ్ను కొనసాగించడం మంచిది. కేవలం 90 రోజుల నిబంధనను ఆధారంగా చేసుకుని ఇన్కమింగ్ సేవలు అంతవరకు తప్పనిసరిగా కొనసాగుతాయని భావించకూడదు. ఎందుకంటే రీఛార్జ్ గడువు ముగిసిన తర్వాత కనీసం 15 రోజుల ఇన్కమింగ్ సదుపాయం మాత్రమే జియో నిబంధనల్లో స్పష్టంగా ఉంది.