EPFO : ఉద్యోగుల భవిష్య నిధి సంస్థ (EPFO) రిటైరైన ఉద్యోగులకు ప్రయోజనం కలిగించే కీలక నిర్ణయం తీసుకున్నట్లు సమాచారం. ప్రావిడెంట్ ఫండ్ (PF) మొత్తాన్ని పదవీ విరమణ సమయంలో ఒకేసారి విత్డ్రా చేసుకోవాల్సిన అవసరం లేకుండా, విడతల వారీగా పొందే వెసులుబాటు కల్పించేలా సిస్టమాటిక్ విత్డ్రాయల్ ప్లాన్ (Systematic Withdrawal Plan – SWP) విధానానికి ఆమోదం తెలిపింది. ఈ విధానం అందుబాటులోకి వస్తే రిటైరైన ఉద్యోగులు తమ అవసరాలకు అనుగుణంగా ప్రతి నెలా కొంత మొత్తాన్ని PF ఖాతా నుంచి తీసుకోవచ్చు. అంతేకాకుండా మూడు నెలలకు ఒకసారి లేదా ఏడాదికి ఒకసారి కూడా డబ్బులు విత్డ్రా చేసుకునే అవకాశం ఉంటుంది. దీనివల్ల పదవీ విరమణ తర్వాత ఉద్యోగులకు ఒకేసారి పెద్ద మొత్తంలో డబ్బు చేతికి వచ్చినప్పుడు దానిని నిర్వహించుకోవాల్సిన ఇబ్బంది తగ్గడంతో పాటు, క్రమబద్ధమైన ఆదాయాన్ని పొందేందుకు వీలవుతుంది.

ఖాతాలో మిగిలిన మొత్తానికి వడ్డీ.. 55 ఏళ్లు దాటిన వారికి తొలి ప్రాధాన్యం
ఈ SWP విధానంలో మరో ముఖ్యమైన ప్రయోజనం ఏమిటంటే.. ఉద్యోగులు తమ PF ఖాతాలోని మొత్తం డబ్బును ఒకేసారి తీసుకోకుండా కొంత మొత్తాన్ని మాత్రమే విత్డ్రా చేసుకుంటే, మిగిలిన బ్యాలెన్స్పై నిబంధనల ప్రకారం వడ్డీ జమ అవుతూనే ఉంటుంది. అంటే అవసరమైనప్పుడు కొంత మొత్తాన్ని ఉపయోగించుకుంటూనే, మిగిలిన సొమ్ముపై వడ్డీ ప్రయోజనాన్ని పొందవచ్చు. అయితే PF ఖాతాలో కనీసం 10 శాతం బ్యాలెన్స్ను తప్పనిసరిగా నిల్వ ఉంచాల్సి ఉంటుంది. తొలుత 55 ఏళ్లు పైబడిన ఉద్యోగులకు ఈ సదుపాయాన్ని వర్తింపజేయనున్నట్లు తెలుస్తోంది. ఈ విధానం అమల్లోకి వస్తే పదవీ విరమణ తర్వాత ఆర్థిక ప్రణాళికను మరింత సులభంగా నిర్వహించుకునే అవకాశం ఉంటుంది. ముఖ్యంగా నెలవారీ ఖర్చులు, వైద్య అవసరాలు, ఇతర జీవన వ్యయాల కోసం PF మొత్తాన్ని క్రమంగా వినియోగించుకునేందుకు ఇది ఉపయోగపడనుంది.