Student Deaths in Schools : ఆటపాటలతో ఆనందంగా గడపాల్సిన బాల్యం విషాదంలో ముగుస్తోంది. చదువుకోవడానికి ఆశ్రమ పాఠశాలలకు వెళ్లిన గిరిజన విద్యార్థులు అర్ధాంతరంగా తనువు చాలిస్తున్న ఘటనలు ఆందోళన కలిగిస్తున్నాయి. పార్వతీపురం మన్యం జిల్లాలో వరుసగా చోటుచేసుకున్న ఇద్దరు ఏడో తరగతి విద్యార్థుల ఆత్మహత్యలు గిరిజన సంక్షేమ శాఖలో కలకలం రేపుతున్నాయి. అసలు చిన్న వయసులోనే విద్యార్థులు ఇలాంటి కఠిన నిర్ణయాలు తీసుకోవడానికి కారణాలేంటి? పాఠశాలల్లో విద్యార్థుల భద్రత, మానసిక ఆరోగ్యంపై అధికారులు తగిన శ్రద్ధ చూపుతున్నారా? అనే ప్రశ్నలు ఇప్పుడు తెరపైకి వస్తున్నాయి.

వరుసగా ఇద్దరు విద్యార్థుల బలవన్మరణాలు
పార్వతీపురం మన్యం జిల్లాలోని గిరిజన సంక్షేమ విద్యాసంస్థల్లో చోటుచేసుకున్న రెండు విషాద ఘటనలు కలవరపెడుతున్నాయి. మక్కువ మండలం అనసభద్ర ఏకలవ్య మోడల్ స్కూల్లో ఏడో తరగతి చదువుతున్న సవర అర్పిత్ తరగతి గదిలోని కిటికీకి ఉరివేసుకుని మృతిచెందిన ఘటన స్థానికంగా విషాదాన్ని నింపింది. ఈ ఘటన మరువకముందే గుమ్మలక్ష్మీపురం మండలం పి.ఆమిటి గిరిజన ఆశ్రమ పాఠశాలలో ఏడో తరగతి చదువుతున్న బిడ్డిక భానుశ్రీ (12) ఆత్మహత్యకు పాల్పడింది. తన స్వగ్రామమైన కారివలసలోని పొలంలో చున్నీతో ఉరివేసుకుని ప్రాణాలు తీసుకుంది. వరుసగా ఇద్దరు విద్యార్థులు మృతిచెందడంతో గిరిజన ఆశ్రమ పాఠశాలల్లో విద్యార్థుల పరిస్థితులపై ఆందోళన వ్యక్తమవుతోంది. ఈ ఘటనలకు దారితీసిన కారణాలు ఏమిటన్నది ఇంకా స్పష్టంగా తెలియాల్సి ఉంది.
Student Deaths in Schools: భానుశ్రీ మృతిపై పలు అనుమానాలు
పన్నెండేళ్ల భానుశ్రీ మరణం కుటుంబ సభ్యులను తీవ్ర విషాదంలోకి నెట్టింది. ముగ్గురు పిల్లల్లో మొదటి సంతానమైన ఆమెపై తల్లిదండ్రులు ఎన్నో ఆశలు పెట్టుకున్నారు. ఐదో తరగతి వరకు స్థానికంగా చదివిన భానుశ్రీని ఉన్నత విద్య కోసం పి.ఆమిటి గిరిజన సంక్షేమ ఆశ్రమ పాఠశాలలో చేర్పించారు. అయితే గతంలో రెండుసార్లు సెలవులకు ఇంటికి వచ్చినప్పుడు తిరిగి పాఠశాలకు వెళ్లేందుకు ఆమె ఇష్టపడలేదని తల్లిదండ్రులు చెబుతున్నారు. ఇంటి నుంచి బయటకు వెళ్లినా సాధారణంగా సాయంత్రానికి తిరిగి వచ్చేదని, ఈసారి మాత్రం ఇలా జరుగుతుందని ఊహించలేదని వారు కన్నీరుమున్నీరవుతున్నారు. బాలిక పాఠశాలలో ఎదుర్కొన్న పరిస్థితులు, ఆమె మానసిక స్థితి, ఇతర సమస్యలు ఏమైనా ఉన్నాయా అనే అంశాలపై సమగ్ర విచారణ జరగాల్సిన అవసరం ఉంది.